"PostХанлык" дип аталган әлеге курс "Ачык университетта” оештырылган тарих курсларының 2нче өлеше. Ул 7 ноябрьдә Казанда башлана.
Курсның максаты – татар халкы тарихыннан системлы белем бирү, халык арасында аны популярлаштыру, татар телендә белем бирүне актуальләштерү, татар милләте формалашу процессларын аңлату.
Әлеге курс ике модульдән тора, дип әйтә оештыручылар. Беренчесе татар халкы яңа сәяси шартларда (XVI йөзнең икенче яртысы – XVII гасыр), икенчесе татар халкы һәм Русия империясе (XVIII гасыр) темаларын ачыклаячак. Казан ханлыгы алынганнан соң татарлар ничек яши? Урта Идел һәм Урал халыкларын чукындыру сәясәте ничек бара? Русия империясендә татар бистәләре ничек көн күргән? – дигән сорауларга җавап бирәчәк, дип вәгъдә итә оештыручылар.
Курс ике ай дәвамында барачак. Һәр дәрес аерым темага багышланган. Лекцияләрне чорга бәйле махсус лекторлар, бу өлкәнең белгечләре Хатыйп Миңнеголов, Дамир Исхаков, Искәндәр Гыйләҗев кебек атаклы галимнәр укыячак.
“Тарих белән кызыксынучы, тарихтан системлы белем булдырырга теләүче һәркем әлеге курсны уза ала. Яшь чикләүләре юк. Алган белемнәрне тыңлаучылар үзләренең төп белгечлекләрендә, авторлык проектларында, эшендә яки көндәлек тормышында куллана алачак”, дип белдерде Азатлыкка Дөнья татар яшьләре форумы рәисе урынбасары Айрат Фәйзрахманов.
Курс лекцияләре һәр атна, сишәмбе кич һәм шимбә көндез оештырыла. Катнашу түләүсез, әмма курска язылучыларның даими йөрүе мәҗбүри диелә. Курсны уңышлы тәмамлаучыларга квалификацияне күтәрү турында махсус таныклык тапшырылачак.
"Ачык университет"ның беренчесе татар тарихына, икенчесе заманча татар мәдәниятенә, ә өченчесе татар телен заманча укытуга багышланган иде. Аларның һәрберсендә 30лап кеше белем алды.
Ачык университет – ул татар телендә өстәмә белем бирү курслары, кыска вакыт эчендә сыйфатлы, тирән белем алу мөмкинлеге. Курсларда белем алучыларны атаклы татар галимнәре һәм гамәли белгечләр, актуаль белем, заманча укыту алымнары һәм татар телле мохит көтә. Киләчәктә бу курслар онлайн-университет форматында эшләячәк дип көтелә. Оештыручылар – Бөтендөнья татар яшьләре форумы һәм “Открытая школа” оешмасы.