Башкортстан татарлары конгрессы республика татарлары җыенын киләсе елның мартында уздырырга карар итте. Чарада 700 делегат һәм кунак катнашыр дип көтелә.
Җыенны 27-28 мартта уздырырга ниятлиләр. Бу турыда бүген Башкортстан татарлары конгрессы рәисе Заһир Хәкимов хәбәр итте.
Җыенның пленар өлеше "Торатау" конгресс-холлында узачак. Татар конгрессы җитәкчелеге конгресс-холл бинасын чара уздырырга биреп торуны сорап Башкортстан җитәкчесе Радий Хәбировка хат язган. Хәбиров үзе дә җыенга чакырулы.
Төштән соң төрле юнәлешләрдә дүрт секция эшләячәк – авылны саклап калу һәм эшмәкәрлекне үстерү, мәдәният, мәгариф һәм яшьләр секциясе. Кичен делегатлар һәм кунаклар өчен мәдәни чара оештырыла, ә 28 мартта "Татар Уфасы" экскурсиясе булачак.
Башкортстан татарлары җыенына әзерлек кысаларында 2021 елның февралендә Башкортстанның бөтен шәһәрләре һәм авылларында да конференцияләр узачак, бу җыелышларда җыен делегатлары сайланачак.