Töbäk dini idäräseneñ möftie Säwbän xäzrät Söläymanovnıñ şayarıbraq äytkän süze bu mäclestä qatnaşuçılarnı kölderep tä aldı. “3 kön eçendä çalınğan qorban itlären 20 köndä aşap beterergä tieşbez”, - dide ul.
Bu mäclesneñ üzençälege räsmi xakimiät binasında uzu ğına tügel. Anda ölkä häm şähär başlıqları Sergey Morozov häm Sergey Yermakov, Ölkä başlığınıñ dini häm milli mäs'älälär buyınça kiñäşçese Tat'yana Sergeewa, Federal' inspektor İğor Juravlev ta qatnaştılar. Tağın ber üzençälek: başta 5 – 6 yäşlek balalar ayätlär uqıdılar, milli biyüllär dä başqardılar. Ä “Tuğan tel” aktivistı Rozaliä Matrosova mönäcät äytte.
Üzeneñ kereş çığışın Säwbän xäzrät tatu yäşärgä häm barıbıznıñ da Adäm belän Hawa balaları buluıbıznı onıtmasqa öndäwe belän tämamladı.
Ölkä häm şähär başlıqları Sergey Morozov belän Sergey Yermakov salqın hawanıñ Sember xalqına zarar kitermäwenä qänäğätlek belderdelär. Gubernator xätta bu salqınnarnıñ xalıq häm xakimiät arasındağı mönäsäbätlärneñ cılına töşüenä dä säbäp buluına şatlığın belderde. İke citäkçe dä milli ğöref-ğadätlärne saqlarğa öndädelär. Tat'yana Sergeevanı iñ soqlandırğanı – möselmannarnıñ yärdämçellege. “Sezne yätimnär yortlarında da, xastaxanä-xospislarda da yaxşı belälär häm sezgä räxmätlär uqilar. Sezneñ xalıq Qorban ayında ğına tügel – yıl buyı moxtaclarğa yärdäm itep kilä, dide Tat'yana İvanovna.
Federal' inspektor İğor Juravlev, yañadan-yaña qanunnarnıñ uñay yaqların añlatu eşläre alıp barğan öçen, din ähellärenä räxmäten belderde. Bu – ilebezdä tınıçlıqnı tä'min itü yulında xezmätegez, dide Mäskäw wäkile.
Mäclesneñ kereş öleşe Rifqat Xismätneñ şuşı çara tudırğan şatlıq xisläre turındağı şiğere belän tämamlandı. Aştan soñ Säwbän xäzrät şuşı mäclesne oyıştıruda matdi yärdäm kürsätkän maltabarlarğa räxmät belderde. Mäcles ğomum täkbir äytü belän tämamlandı.
Berniçä qısqa xäbär. Qatnaş xalıqlı Zelenaya Roşça awılınıñ imamı Mäxmüt xäzrät Kadraliev yaqınraq urnaşqan şundıy uq urıslı-çuaşlı-tatarlı urıs awılları Otradnoe häm Gimovoda mäxällälär oyıştırğan häm anda da dürtär-bişär qorbannar çalğannar.
Ölkädä yaña qanun çıqtı. Anıñ töp mäğnäse – sponsorlar yärdäm aqçaların turıdan-turı moxtac oyışmalarnıñ banktağı xisabına tügel – xakimiät xisapları aşa ğına küçerä ala.
Ölkä awıllarında 154 keşe ata-ana xoquqlarınnan mäxrüm itelgän. Säbäbe – eçkeçelek.
Uzğan yılda cinayätçelek 40 protsentqa artqan. Yıl eçendä 8000 cinayät terkälgän, şularnıñ 60 protsengtı ğına açıqlanğan.
Şähär merı Sergey Yermakov toraq-kommunal' xezmät öçen tüläwne yıl başınnan 19,5 protsentqa arttıru turındağı qararğa qul quyğan.
Ayrat İbrahim, Sember.