“Lenin Watanı” isemle tıyulıqnıñ kürgäzmälär zalına çaqıru käğäze “Qazannıñ 1000 yıllığına bağışlanğan dekorativ-qullanma sänğäte belän tanışu täqdim itä.
Kürgäzmäne açu tantanasında qatnaşuçılar başta yartı säğät çaması, östän-östän genä bulsa da, anda quyılğan äyberlär belän tanışıp yördelär. Anda quyılğan bixisap eksponatlarnıñ barçası da milli rux belän suğarılğan. Borınğı Qazan küreneşläre belän maxsus ekran tanıştıra.
Şul arada “Qazan suvenirı” direktorı Natal'ya Xarçenko belän keçkenä äñgämä qoru mömkinlege dä tabıldı. Kürgäzmä Qazanda 10 yıl çaması eşläp kilä ikän inde. Ä Tatarstan rayonnarı xalqın tanıştırunı ike-öç yıl elek başlağannar. Ä çit ölkälär xalqın anıñ belän tanıştıru başlana ğına. Moña qädär barı tik Mäskäwdä genä bulğannar. (Xäyer, bu turıda “Azatlıq” radiosı aşa Näzifä Kärimova xäbär irgän ide inde). Sember qalası – ikençe. Mäskäwdän soñ Semberne saylawların Natal'ya xanım ölkäneñ yaqınlığı häm biredä millättäşlärebezneñ küpläp yäşäwe belän añlattı. Annan soñ tözätebräk tä quydı: başqa millätlär wäkilläreneñ dä tatar sänğäte belän tanışu bik möhim, çönki tatar milli sänğäte bu xalıqqa qarata tirän ixtiram tärbiälärlek. Ä üzara ixtiram Rusiä xalıqlarına bik tä kiräk närsä.
Kürgäzmäne açu tantanasında baytaq çığışlar buldı. Şulardan ayıruça iğtibarğa layıq berniçä özek belän tanıştıru da urınlı bulır kebek.
Natal'ya Xarçenko. Bezneñ äyberlär xalıqara standartlarğa turı kilä. Alar bik centekläp tikşerü aşa ğına qabul itelälär. Satıp alığız, bäyäsennän qurıqmağız, yaxşı närsä arzan bula almıy.
Ölkäneñ Mädäniät häm sänğät idäräse başlığı Tat'yana İvşina. Aurupa illärendä mondıy suvenirlar maxsus kibetlärdä satıla. Qazan da mädäniät aşa aqça eşläwgä öyrängän häm bezne dä öyrätä. Min biregä balalarım belän kiläçäkmen häm sezne dä şuña öndim.
“Lenin Watanı” tıyulığı direktorı Aleksandr Zubov. Bezne zurlağanığız öçen räxmät. Qazan üzen böten dönyada tanıttı. Üzebezdä Qazannı propagandalau bezneñ şähärneñ dä alğarışına etärgeç birer, ürnäk alıp yäşärbez.
Sember tatarlarınıñ avtonomiäse räise Roza Äxmätcanova. Qazannı “Qoyaşlı şähär” dip atawığız öçen räxmät. Çınlap ta ul, tön'yaktarak urnaşqan buluına qaramastan, bezne dä cılıta. Maturlıq – töp tärbiä çarası. Häm bu kürgäzmä bezneñ balalarıbıznı da tärbiäläwgä bik köçle qoral bula ala.
Kürgäzmäneñ rässam-dizaynerı Margarita Yevdokimova. Tatar çabata kimägän, anı çabata yasarğa talanıp yäşäw genä mäcbür itkän. Şuña kürä bez biregä çabata tügel – itek-çiteklär genä alıp kildek. Tağın änä türdä garmun uynap utıruçı zur mäçegä iğtibar itegez. Ul xäzer Qazannıñ ikençe simvolı da bulıp sanala. Ğorur, tuğrılıqlı, eşçän mäçe – Qazan mäçese Piterburnı tıçqan-qomaq yawınnan berniçä märtäbä qotqarıp qalğan. Äle dä Ermitajnı “Qazan mäçese” saqlıy. Tatar üze dä eşçän xalıq, mäçesen dä eşläp aşarğa öyrätkän. Qayber başqalar kebek mäçene “pusi-musi” öçen genä totmağan.
Çaranı “Lenin watanı” tıyulığınıñ direktorı urınbasarı Rawilä Salaxova alıp bardı. Ul älege kürgäzmäne xalıqqa citkerü buyınça eş plannarı belän büleşte häm qatnaşuçılarnı da xalıqnı biregä cälep itüdä aktivlıq kürsätergä öndäde. Üze isä ölkä üzägendä belem aluçı barlıq studentlarnı da cälep itäçägen dä belderde.
Rawilä xanım Qazannıñ yuğarı uqu yortların tämamlağan semberlelär belän oçraşu kiçäläre oyıştırırğa da niäte belän dä büleşte. Ä alar biredä bik tä küp. Qazan Däwlät universitetın tämamlawçılar 1-martta cıyılaçaqlar. Tizdän bulaçaq ikençe çara – bıyılğı xacilar belän oçraşu.
Ayrat İbrahim, Sember.