Küptän tügel Rusiädäge dedovşçina başın qalqıtıp, anıñ açı näticäläre dönya cämäğätçelegenä bilgele buldı. Çiläbe tankistlar uqu yortında Andrey Sıçev imgätelgännän soñ başqa töbäklärdäge şundıy wäxşileklär dä açıla başladı. Bu atnada Ufada Nasrulla Dautov xärbilär tarafınnan qıynalıp, Ufa xastaxanäsendä wafat buldı. Ä Qazan xärbi tribunalında bu könnärdä Perm ölkäseneñ Barda rayonınnan xärbi xezmätkä alınğan El'mart Şäripovnı ğazaplağan keçe serjant Çipul'skiy östennän cinayät eşe qarala. Qazan tank uçilişçesında xezmät itüçe 19 yäşlek El'mart Şäripov xezmättäşe tarafınnan tuqmalıp, xezmäten taşlap qaçqan. Ul adaşıp, Qazan yanındağı ber yortnıñ podvalında aydan artıq biklänep yatqan. Berniçä distä kilogrammğa yabıqqan El'martnı oçraqlı räweştä tabıp, gospital'gä kiterälär. Ä anı ğazaplawçı mäxkämädä saq astına alınğan. Mondıy xällär turında borçılıp, xatlar yazuçılar kön sayın oçrap tora. “Azatlıq” radiosınıñ Qazan bülegenä bu atnada şundıy xat kilde.
“Här tuğan yaña kön armiä taraflarınnan qotoçqıç xäbärlär kiterä. Älege xäbärlärne tıñlağaç, çäçlär ürä tora, yöräk qısıla, yoqı qaça. Uylana torğaç mi küzänäkläre çänçelä başlıy, aqıl arıy”. Bu süzlärne Leninogorski rayonında yäşäwçe Güzäliä xanım Loqmanova “Azatlıq” radiosına yullağan xatı aşa citkerde. Güzäliä xanımnıñ tuğanı İl'dar Yauşev bu könnärdä Ul'yanda xärbi xezmäten üti. Xat avtorı ütkän qış üz tuğanı yanına baruı, anda baytaq tatar-başqort yegetlären oçratuı turında yaza. Ul yegetlärne xäwef-xätärlärdän saqlap qalırğa, alarğa yärdäm itärgä öndi. Sänğät ähelläre tarafınnan cır-moñ bäyrämen ütkärergä bula, xäzrät Rämil Yunısnıñ wäğäzläre dä xezmät itüçe yegetlärneñ küñelen kütärep cibärer ide dip yaza ul. Güzäliä xanım şulay uq baylarğa da möräcäğät itep, alar törle täm-tomnar, ciläk-cimeşlär belän yegetlärgä küñel bäyräme yasıy ala di.
Xatta maxsus “Azatlıq” radiosı xäbärçelärenä dä möräcäğät bar. Xärbi xezmät başlıqların, xärbi tabiplarnı, xärbilärneñ äni-ätilären çaqırtıp tügäräk öställär oyıştırırğa häm bergäläşep faciğäle xällärne buldırmaw yulların ezlärgä öndi Leninogorskida yäşäwçe tıñlawçıbız. “Azatlıq”nıñ urındağı xäbärçeläre yaqında urnaşqan xärbi şähärçeklärgä barıp, yegetlärebez belän küzgä küz oçraşıp, alarnı borçığan mäs’älälärne çişüdä yärdäm itsen ide, dip yaza Güzäliä xanım. Ul şulay uq “Azatlıq”nıñ Ul'yandağı xäbärçese Ayrat İbrahimğa möräcäğät itep, Ul'yandağı desantçı yegetlärneñ häm üz tuğanı Tuymazı rayonı yegete İl'dar Yäuşewnıñ xälen beleşergä ütende.
Bu Leninogorski rayonında yäşäwçe Güzäliä xanım Loqmanovanıñ “Azatlıq”nıñ Qazan byurosına yullağan xatı ide.
Al'bina Zäynulla