Älege vizitnıñ maqsatın Kurtuluş äfände menä niçek añlattı
Törkiä Qazan, Piterbur, Yekaterinbur, Rostov, Ufa şähärläre belän tığız xezmättäşlektä urnaştırdı. Ul''yan ölkäse dä – qızıqsınırlıq töbäk. Mäsälän, Ul''yannıñ “Vostoçnıy” isemle hawa alanı Ul''yannan Antaliägä tup-turı turistik reys buldıru mömkinlege birä. Anda kürşe Samar, Penza, Sızran, Tol''yatti şähärläre turistların da cälep itärgä bula. Şunlıqtan biredä Turistik firma açu mömkinlegen qaradıq. Rusiä belän säwdä äyläneşe 15 milliard dollar täşkil itä. Ä Ul''yan ölkäseneñ bu sanda öleşe bik az. Anıñ östäwenä sezneñ gubernator investitsiälär belän qızıqsına. Bu isä Törkiäneñ iğtibarına da layıq.
“Kilüegezneñ maqsatına ireştegezme soñ?” – digän sorawğa Kurtuluş äfände menä ni dide:
Bezneñ maqsatlar bik tıynaq ide: ölkä mömkinlekläre belän tanışu, xezmättäşlek mömkinleklären öyränü. Şulay da keçkenä bulsa da, anıq kileşülärgä dä ireştek.
Bez kürgän-belgännärebez turındağı raportnı tieşle räsmi dairälärgä häm biznesmennar iğtibarına citkererbez. Häm Törkiädä mondıy mömkinleklär belän qızıqsınuçılar tabılır, dip uylıybız. Ber-berebez belän tanışu-añlaşu da faydalı buldı, dide ilçe.
Ölkä citäkçelege qunaqlarnı vizitnıñ berençe könendä UAZ belän tanıştırdı, ikençe könne - “Aviastar” isemle oçqıçlar tözü zavodı häm anıñ binihayä zur oçqıçları öçen maxsus tözelgän “Vostoçnıy” hawa alanı belän.
Kurtuluş äfände äytkän “keçkenä bulsa da anıq kileşülär” isä iyünneñ 13 Ul''yan – Antaliä arasında turıdan-turı aviareys açıluı häm İstanbulğa berniçä “UAZ-patriot” avtomobile cibärelüe.
İlçe äytüençä, Ul''yan qalası Vladimir Ul''yanovnıñ tuğan cire buluı belän dä qızıqsındıra. Çönki üz ilendä küp üzgäreşlär kertkän Leninnı Törkiädä Atatörk belän tiñlilär, di. Häm lenin teması Törkiä belän Ul''yan ölkäse arasında turistik biznesnıñ nigeze bula ala. Törkiä ilçese şulay uq “Ul''yannıñ berär yuğarı uqu yortında törek tele fakul''tetı açılsa, bez moña bik şat bulır idek häm tieşle yärdämgä dä äzerbez”, dip belderde.
Yuğarı dairädäge räsmi äñgämälärdän tış, “Kolizey” isemle yal üzägendä qunaqlar häm tatar maltabarları berlege “Sember” äğzaları arasında eçkersez söyläşü buldı. Qunaqlarnı çäkçäk belän qarşıladılar. Üzeşçännärebez milli moñnar belän dä sıyladılar alarnı.
Berlek citäkçese, gubernatornıñ iqtisad buyınça kiñäşçelärennän berse Färit Äyupov İlçe Kurtuluş Taşkent äfändene berlekneñ şäräfle äğzası dip sanaw turında aña diplom tapşırdı. Färit äfände fikerençä, yaqınnanraq tanışu tuğandaş xalıqlar arasında tığızraq mönäsäbätlär urnaştıruğa da yärdäm itär.
Tik, nişliseñ inde, maltabarlarıbıznıñ qunaqlar belän aralaşuı urısçağa tärcemä aşa bardı.
İsmäğıyl'' Gaspralınıñ “Teldä, fikerdä, ğämäldä – berlek” digän şiğare zamanaları artta qalğannar inde, küräseñ.
Ayrat İbrahim, Sember