Qazannan 50-55 çaqrım yıraqlıqta Qazansu yılğası yarında taw itägendä çatırlar tezelep tora. Äläm dä kürenä. Bu utrawda inde berniçä kön däwamında möstäkıyl' genä yäşlär yäşi. Hawa torışı da, qırğı şartlar da alar öçen kirtä bulmağan. Köndälek tormıştan ayırılıp tatar xalqınıñ sälätle yäşläre şulay yıl sayın «Sälät-İske Qazan» alanında oçraşa. Biredä studentlar, yuğarı uqu yortın tämamlağan yäşlär dä, alar arasında filologiä fännäre kandidatı da bar. Bu yäşlär barısı da sälätle. Tik härberseneñ närsägä osta buluı älege bilgele tügel. Çönki alar monda berniçä kön genä äle. Alar äytüençä, näq menä şundıy tabiği şartlarda sälät yaxşıraq açıla. Älege alannıñ urnaşqan cire dä bik xikmätle bit. İske Qazan. Riwayätlär buyınça berençe Qazan qalası näq şunda bulğan.
Yäşlär arasında ğädäti äybergä äylängän eçep, tartıp yörmi alar, ä şuşındıy tarixi cirdä bergä cıyılıp, oçraşa, aralaşa, bik qızıqlı häm ähämiätle ğämällär başqara. İske Qazanğa kilgän yäşlär nigezdä Tatarstannıqı ide. Bıyıl isä yäşlärneñ geografiäse şaqtıy kiñäygän. Monda xätta Yıraq Könçığıştan millättäşlärebez kilde.
Ä 7-11 iyül könnärendä İske Qazanlılar häm barlıq selkeşlär dä izge Bilär cirenä baraçaq. Anda ütkärelä torğan festival'dä Tatarstannan, şulay uq Rusiäneñ küp kenä töbäklärennän kilgän balalar, qunaqlar qatnaşır dip kötelä. Yäşlär öçen törle bäygelär, yarışlar, icat kiçäläre, konsertlar ütkäreläçäk anda. Älege festival'neñ maqsatı - sälätle tatar balaları belän eşläw, alarğa ruxi wä hönäri üsüdä yärdäm itü, şulay uq intellektual'-ruxi bay buın tärbiäläw.
Al'bina Zäynulla Qazan