Şuşı kitapnı “Ömet” redaksiäse basmağa äzerläde dä. Ğalimcan ağanıñ balasıday sanalırlıq “Ömet”neñ bügenge üz xälläre niçek soñ?
Şöker, diärgä dä buladır: tirajı buyınça ul - başqa ölkälärdä çığa torğan tatarça gäzitlärdän iñ uñğanı. 6000гә yaqın tirajı belän ul Ufa, Qazan basmalarınnan ğına qalışa. Şulay da iyül ayındağı berençe sanı iyünnekennän 433 danägä kimräk çıqtı – 5282 danä. Redaksiä xezmätkärläre äytüençä, moña ällä ni poşınırğa da kiräkmi: cäyge yal waqıtında yıl sayın kimi häm avgust-sentäberlärdä elekke sanına qaytıp citäçäk. Dimäk, bıltırğı däräcädä qalunı da uñış dip sanarğa turı kilä. Häm monın öçen dä redaksiä zur tırışlıqlar kürsätä. Ber ike misal. Ölkäneñ Ul''yanov rayonı başlığı fatixası belän, xakimiät binasında maxsus söyläşü buldı. Anda qatnaşqan maltabarlar Rawil Nasıyrov häm Vladimir Quzin üz xezmätkärlärenä 60 danä yazdırırğa wäğdä birdelär. Rayon xakimiätendä eşläwçe 12 millättäşebez dä “Ömet”le bulaçaq, didelär. Ölkä Sabantuyı barışında zur xäreflär belän yazılğan şiğar-öndämä maxsus quyılğan östäl yanına çaqırıp tora ide – 29 keşe “Ömet”le bulıp kitte.
Redaksiä Poçta xezmätendäge millättäşlärebez belän dä tığız elemtädä tora. Mäsälän, Yaña Malıqlı rayonı İske Tögälbuğa awılınıñ xat taşuçısı Fäniä Minebayıwa üze genä 98 danä “Ömet”kä yazdırğan. Häm Fäniä xanım şuşı xezmäte öçen Räsäy poçtası bäyräme tantanasında büläkkä dä layıq buldı. Tik bu bäyräm küñelsez uylarğa da säbäp birde. Elemtä xezmätkärläre arasında millättäşlärebez dä baytaq. Ämma, İsxaq Xälimev äytüençä, olawlap öläşelgän maqtaw käğäzlären taratqanda nibarı 3-4 kenä tatarça familiä yañğıradı. Alarnıñ ğomum sanı bik küp bulsa da.
Bäyrämneñ tağın ber ğibrätle yağı: Poçta xezmätkärlärenä buşlay maxsus kiem buldırıla häm alarnıñ eş xaqı yarıysı ğına artaçaq. Xäle bardır: aqçanı küp qayıra bit bu Däwläti unitar şirkät. Monopolist bularaq, gäzit-jurnallarnı uquçığa citkerü bäyäsen “3 p - pol-pales-potoloq” prinsibı nigezendä dä quyarğa xoquqlı: posmotrel na pol, posmotrel na potoloq, wısosal iz pal''sa, dilär ul oçraqta urıslar.
Şul biçara “Ömet” gäziten uquçığa citkerü bäyäse - redaksiäneñ barlıq qalğan çığımnarına tiñ. Anıñ östäwenä här danäne uquçığa tapşıru öçen tağın 16 tien taläp itelä, di. Bu yaña salım üze genä dä yılına 60 meñgä citä: ay sayın 5әр meñ suıralar ikän. Aptırarlıq ta: ber ük xezmät öçen ike tüläw kilep çığa bit. Härxäldä, uquçı ğına tügel, redaktor äfände dä monı añlamıy.
Şundıy talaw häm tatarça uqırğa sälätle tatar sanı haman kimi barğan şartlarda da “Ömet” yäşärgä tırışqanday. Ä Qazan basmalarına Sember yaqlarında yazıluçılar sanı yıl sayın tübän tägäri bara. Xäyer, monısı inde ayırım söyläşüne taläp itä.
Ayrat İbrahim, Sember