Lenin memorial' üzäge zalında uzğan bu çarada başqa patriotik köçlär dä qatnaştılar. Şulay uq tatar milli xäräkäte wäkilläre dä bar ide. Cıyılğan xalıqnı patriotik şiğer-cırlar yañğırawı qarşıladı.
KPRFnıñ ölkä komitetı sekretare Aleksandr Kruglikov şundıy çaranıñ böten il buyınça da oyıştırıluın belderde. Artaban maxsus äzerlängän rezolyutsiäneñ eçtälege belän tanıştırdı.
Berläşkän Millätlär oyışmasınnan süzdän eşkä küçüne taläp itärgä - däwläti wazifalı terroristlar tarafınnan oyıştırılğan terror ğämällären, bala-çağa, xatın-qızlarnı cäberläwne kiçekmästän tuqtatu çaraları kürsen. Ğämmäwi terror oyıştıruçılarnı Xalıqara tribunalğa tartırğa. Bäysez däwlät bulğan Liwannıñ yuğaltuların terroristik däwlät tarafınnan qaplawnı tä'min itärgä.
SSSR xalıqları Böyek Watan suğışınnan soñ suğış waqıtında cäberlängän yähüdlärneñ üz däwlätläre buluın yaqlap çıqtı. Şulay uq kolonial' tärtipneñ cimerelüe arqasında irek alğan Fälästin xalqınıñ da üz däwläte buluın tanırğa çaqırdı. BMO da üz qararı belän monı rasladı. Häm näq şul BMO bu qararnıñ ütäleşe öçen cawaplı da. Ä monıñ haman tormışqa aşmawında AQŞ häm anıñ dustı İzrail' ğäyıple.
Artaban Aleksandr Kruglikov rezolyutsiägä kiräkle tözätmälär, üzgäreşlär kertü öçen anıq täqdimnär belän çığışlar yasarğa öndäde.
Anıñ İzrail'ne däwläti terrorizmda ğäyıpläwe “Xezmätçän Ul'yanovsk” digän oyışma wäkile Konstantin Poroşinnıñ açuın çığardı, buğay. Anıñ fikerençä, İslam terrorizmı däwläti terrorizmnan küpkä qurqınıçraq ikän.
Alar, islamçılar, bötendönya buyınça berdäm İslam däwläte tözemäkçelär. Häm alar bernindi qağidälärne dä tanımıylar.
Aleksandr Kruglikov ta cawapsız qalmadı.
Möselman xalıqların kebek ük, yähüdilärne dä kiñ küñelle Pravoslavnaya Rus' “priyutila” ğına tügel, alar belän uqmaştı häm alardan başqa yäşäyeşne çın küñeldän qabul itte.
Yähüdlärgä qarata “priyutili” süzläreneñ, bälki, nigeze dä bardır. Ä menä möselman xalıqların niçek “priyutit'” itkännärenä tarix şahit. “Bolğar yañarışı” oyışması räise Şäwkät Bogdanov biredäge töp xalıq bulğan bolğar babalarıbıznıñ monnan 1200 yıl elek näq şuşında İslam dinen qabul itkännären iskä töşerde häm bu dinneñ töp üzençälege – tatulıqqa omtılu ikänenä basım yasadı. Monnan 13 ğasır elek yäşägän böek şağir häm däwlät eşleklese Qol Ğäli, dide ul, üzeneñ “Yosıf kitabı”nda barlıq dinnär totuçılarnı üzara ixtiramğa öndägän. Häm ul bu turıdağı özekne yattan uqıp ta kürsätte.
Qalğan çığışlar isä İzrail'ne, Amerikanı faş itü, Rusiäneñ saqlanu mömkinleklären nığıtu kiräklege, Nijgar ölkäsendä bulaçaq AQŞ belän bergä xärbi künegülärgä qarşı eş cäyelderü kebek mäs'älälär turında buldı. Çarada millättäşlärebez dä baytaq ide. Yaqın Könçığıştağı qanqoyışqa alarnıñ mönäsäbäte nindi ikän soñ?
Nigezdä, şul uq: İzrail'ne dä ğayıplilär, läkin küpçelek fikerençä, İzrail' AQŞ quşqannı ğına eşli. Ä AQŞ öçen Siriäne häm bigräk tä İrannı suğışqa tartıp kertü möhim. İke keşene äsirlektän qotqaru öçen meñärlägän keşene üterüne başqaça añlap ta bulmıy.
Beräw ğäräplärneñ suğışqa äzerlänä belmäwen ğayıpläde. Alarnıñ oçqıçları da, alarğa qarşı zenit qoralları da yuq. Ä hawa kem qulında – ciñü dä şunıñ qulında bula bügenge zamannarda.
Kommunistlar oyıştırğan çarada Ayrat İbrahim buldı. Sember