Comğa könne İdel-press näşriät yortında Räşit Vahapov isemendäge ikençe xalıqara tatar cırı festivalenä äzerlek turında matbuğat oçraşuı uzdı. Qatnaşuçılar arasında festival'neñ citäkçese Rifat Fattaxov, Tatarstannıñ häm Rusiäneñ atqazanğan ateistı Zilä Sönğatullina, şağir Rinat Xaris ta bar ide. Bıyıl, Räşit Vahapov isemendäge ikençe xalıqara tatar cırı festivale ädäbiät häm sänğät yılı qısalarında uzdırıla. İkençe Vahapov festivaleneñ tantanalı açılışı 2006 yılnıñ 2 aprelendä Tübän Novgorodta – cırçınıñ tuğan yağında uzğan ide. Bügenge köngä qädär älege festival' Nurlat, Riğa, Berlin kebek tatarlar yäşägän küp kenä töbäklärdä ütkärelde. Oyıştıruçılar süzlärenä qarağanda, oktäber- noyäber aylarında İjau, Çabaqsar, Ul'yan şähärlärendä dä çaralar uzdıru küzdä totıla. Matbuğat oçraşuında Vahapov festivalen başlap yörüçelärneñ häm oyıştıruçılarnıñ berse bulğan Rifat Fättaxov Festival'neñ tatar moñına susağan millättäşlärebez tarafınnan yaratıp qabul itelüen äytte.
“Älege festival' Rälit Vahapov iseme, anıñ mirası, anıñ moñnarı bezneñ tatar xalqın tağın da nığraq berläştertergä yärdäm itä. Mäsälän, töbäklärdä ul tatar mädäniäteneñ nindider ber köç belän üsep kitüenä etärgeç birä. Äytik, Udmurtiädä festival' qısalarında Vahapov isemendäge tatar cırı häm sänğäte dip atalğan bäyge uzğan. Monda 100 artıq keşe qatnaşqan. Festival'neñ şundıy kiñ yañğıraş tabuı, ul bezneñ xalıqta genetik däräcädä bulsa ğına da üzeneñ moñnarnı, mirasına mäxäbbäte sünmägän. Min moña Sank-Peterburgta häm yekaterinburgta iğtibar ittem. Bezneñ kiçälärgä bik zatlı, zamança kiengän yegetlär, qızlar kilde. Häm alarnıñ küpçelege tatarça belmi dä. Ämma alar konsertnıñ başınnan axırına qädär yotlığıp tıñlap utırdılar. Küräseñ alarğa bezneñ milli moñnarıbız tä'sir itä.”
Şulay uq Rifat Fattaxov töbäklärdä Vahapov festivalen ğämälgä quyuçılar arasında cirle xakimiätlär buluına da basıp yasadı.
“Festival' qayda ğına uzmasın ul xalıq tarafınnan bik cılı qabul itelä. Alay ğına da tügel, ul äle zur ictimaği yañğıraşqa da iä. Cirle xakimiätlärneñ bezneñ festival'ne yaqlawı da moña ber dälil.” Oçraşuda şulay uq Rinat Xarisnıñ bu könnärdä dönya kürgän kitabın da täqdim itü buldı. “Cırçı” dip isemlägän yaña poeması urın alğan älege kitap R.Vahapovqa bağışlanğan. Oçraşuda Rinat Xaris älege poemadan ber özek uqıdı.
Bıyıl Räşit Vahapov isemendäge ikençe xalıqara tatar cırı festivaleneñ yomğaqlaw gala-konsertı dekaberdä ayında Qazanda uzaçaq. Bäyräm konsertında Qazannan İlham Şakirov, Älfiä Avzalova, Zilä Sönğatullina, İdris Gaziev, Rafael' İl'yasov, Venera Ğaniewa, Niciä Terkulova kebek tanılğan cırçılar çığış yasayaçaq. Şulay uq Latviä, Germaniä, Finlyandiä, Qazaxstan, Çuaşiä, Udmurtiä häm Rusiäneñ başqa töbäklärennän cırçılar qatnaşaçaq dip kötelä. Alar arasında dön'yaküläm tanılğan qazax cırçısı Bibigöl Tulegenova, Eston operasınıñ äydäwçe solistı Vil'vu Valdama da bar.
Gölnaz Şäyxetdin