25 oktäberdän 2 noyäbergä qädär Ufada häm Başqortstan rayonnarında Tatarstannıñ atqazanğan artistı Gabdelfät Safinnıñ konsertları uzarğa tieş ide. Konsertqa biletlarnıñ 80 protsentı satılıp betsä dä, tamaşa bulmıy qala yazğan.
Cırçı Gabdelfät Safin kürşe respublikadağı mädäniät sarayları belän konsert uzdıru turında kileşülärne sentäber başında uq tözep quyğan bulğan. Ämma cırçını mädäniät yortlarına kermiäçäklär ikän. Gabdelfät Safinnıñ Başqortstanda çığış yasıy almawınıñ säbäplären İskändär Siraci “samimi häm kölkele” di üzeneñ Tatarstan yäşläre gazetasınıñ 26 oktäber sanında basılğan mäqäläsendä. Älege wäzğıäytqä açıqlıq kertüne sorap Azatlıq radiosı Gabdelfät Safinnıñ prodyuserı ruzilä Safinağa möräcäğät itte. Häm ul mäsäläne bolay dip añlattı.
“Ufa şähärendäge berniçä zalda konsert uzdıru turında 15 sentäberdä kileşülär tözelgän ide. Häm bezgä 1 oktäberdä bezneñ marşrut käğäze bulmağaç, zalğa kertelmisez dip. Ämma bu köngä qadär bezneñ 80 protsent bilet satılğan ide inde. Başqortstan mäğärif ministrlığında monı bolay dip añlattılar. İmeşter bez başqortstannıñ xalıq artistı Fidan Gaffarov turında naçar süz äytkänbez ikän. Läkin bu alay tügel. Annan soñ ikençe mäs'älä kilep bastı. Bez “Urtaq tüşäk” pornografik gäziten çığarabız imeş. Gärçä ul pornografik gäzit bulmasa da. Annan sñ da süz bette. Bezgä Başqorstannıñ mädäniät ministrlığı isemenä xat yazırğa quştılar. Bez alarğa öç xat yulladıq. İkesen üzebez yazdıq, bersen Tatarstan mädäniät ministrı Zilä Välieva qulın quyıp cibärde. Läkin bezgä marşrut bite birelmäde. Öç xat ta cawapsız qaldı. Bu bik awır äyber, çönki xäzer monda cırçığa qarata näfrät tua. Tamaşaçı bit monı belmiçä qala, alarğa başqaça añlatalar bit anı. Bezneñ öçen bu bik tä qızğanıç.”
Şunı äytergä kiräk, ağımdağı yılnıñ berençe oktäberenä qadär Başqortstanda, Rusiäneñ başqa töbäklärendä dä şähärlärdäge konsertlar öçen cirle mädäniät ministrlıqlarınnan röxsät kiräkmi ide. Barı tik rayonnar buylap yörgändä, ber konsert törkeme ikençese belän oçraşmasın öçen artistlarğa birelä torğan käğäz genä ul. Gabdelfät Safinğa oçrağında ul bötenläy kiräk tä tügel ikän, çönki cırçı Başqortstandağı mädäniät yortları belän kileşülärne sentäber başında uq tözep quyğan bulğan, ä marşrut käğäzläre ğämälgä 1 oktäberdän genä kergän. Qanunnıñ isä şundıy üzençälege bar, ul qabul itelgänçe tözelgän barlıq kileşülär barıber üz köçlärendä qala häm alarğa bernindi dä östämä röxsätlärneñ kiräge yuq.
İskändär Siraci isä “Ufalarğa barularım - 2” mäqäläsendä, Başqortstan xakimiäteneñ cırçı nindider gäzit çığarğanı öçen genä marşrut käğäzen birmäwen bernindi dä qısalarğa da sıymıy, marşrut digännäre üze ber sıltaw ğına di. Bu käğäzneñ barı tik Başqortstanda ğına ähämiätkä iä häm anısı da tatar artistlarına ğına qağıluına basım yasıy avtor. Häm monı tatarlarğa qarşı provokatsiäneñ çirattağısı dip atıy. Äytik, noyäber ayında Başqortstanda Munça taşı, Zäynäp – Zöfär konsertları bulır dip kötelä, alarğa röxsät käğäzläre birelgän. Ämma Gabdelfätne kertmägäç, keşelärneñ aldanudan qurqıp, bu konsertlarğa da kilmäwe mömkin. Mäqälä avtorı fikerençä, Başqortstan xökümäte barsın da döres uylağan – beräwlärne kertmi, ikençelärgä röxsät birä. Ämma provokatsiägä bireşmäwçe Gabdelfät Safinnıñ konsertları Başqortstan başqalasınıñ Ufa Utları, Ogni Ufı zalında 18 – 19 noyäber könnärendä uzaçaq.
Gölnaz Şäyxetdin