Törle töbäklärdän bu çara turında “Azatlıq” aşa xäbärlär buldı inde. Şulay da Sembernekeneñ qayber üzençälekläre dä iğtibarğa layıqtır. “Nihayät” digäne – iñ soñlap, Qazanda uzaçaq yomğaq aldınnan ğına buluınnan. Şul üpkäne Räşit Wahapovnıñ yaqtaşı Ramil Kuramşinğa da belderergä turı kilde. Ä ul ikençeräk uylıy ikän.
Törle ölkälärdä uzğaç qına Sembergä, sezne ixtiram itep, şomartıbraq alıp kildek. Moña şatlanırğa ğına kiräk. Anıñ belän uynarğa turı kilmädeme? – digän sorawğa Ramil üzeneñ soñ tuuına häm Räşit abıynıñ irtä, bik irtä yaqtı dönyadan kitüenä köyeneç belderde. Tuğan awılı Quçqay pojar awılına qaytqalıy, şulay uq Räşit abıynıñ tuğan awılı Aqtüktä yış bula ikän Ramil. “Azatlıq” radiosı aşa awıldaşlarınıñ anı ixtiram itülären işetkänenä dä bik şat, dide ul.
“Milli moñnı ğailä tärbiäse birä. İñ qıyın çaqlarında äbiem sandığınnan Räşit Wahapov cırları yazılğan qara tälinkäne çığarıp, onıqların milli moñ belän sıylıy ide. Şul minem bäğeremä señgänder. İkençedän, minem omtılışlarım kürenekle şäxeslärebez Ğomär ağa Bäşirov, İlham abıy Şakirov tarafınnan zur xuplaw taptı. Häm İlbaşı Mintimer ağanıñ märxämätle, ixtiramlı mönäsäbäte dä zur yärdäm birde”. Awılığızdağı Wahapov muzee elek bik tä “tıynaq” ide. Bu yaqtan üzgäreşlär yuqmı? “Älegä yuq. Ämma monıñ östendä eş alıp barıla. Xätta Nijgar ölkäse başlığı Şansev fatixası belän awılda Räşit ağanıñ häykäle dä bulırğa oxşıy. Älbättä, üzebezdän dä tırışlıq taläp itelä.”
Ä konsert Ölkä filarmoniäseneñ elek “Russkaya duşa” dip atalğan qıllı orkestrı başqaruında Säydäş marşı belän başlanıp kitte.
Annan soñ cirle üzeşçännärennän urıs häm tatar kiemnärendäge bişär qız “Bez Räsäydä yäşibez” dip atalğan xoreografik tamaşa kürsättelär. Tantanalı açışqa kilgän Ölkä xakimiäteneñ 3 wäkile, kiñäşmägä baru xacäte arqasında kitärgä mäcbürlär, dip ğafu ütenep kitkäç, tamaşanı alıp baruçı tatarçağa küçte. Festival'' bik tä yuğarı oyışqanlıq belän çın milli möxittä bardı. Oyıştıruçılar cırçılarnı da tirän zäwıq belän saylıy belgännär. Firdüs Kadıyrov, mäsälän, Xaq Täğälä birgän moñın döres qullansa, üstersä, Räşit Wahapov yuğarılığına da ölgäşä alır, dip utırdı kürşe ağay. Röstäm Äsäyevneñ iskitkeç köçle moñı, Bäşirä Nasıyrovanıñ nazlı tawışı Wahapov varislarına bay buluıbıznı açıq kürsätte. Konsertnı şulay uq ölkäneñ törle rayonnarınnan çaqırılğan unnan artıq üz talantlarıbız da yarıysı ğına bizädelär. Şöker, diärgä kiräk. Bu cähättän Mäläkäs qızı Fäniä Xäliullovanıñ çığışına tuqtalıp ütü dä kiräkter. Ul İlham Şakirovnıñ “Sin sazıñnı uynadıñ” digän cırı belän kilgän. Bu cırnıñ üzençälekle, çın şärqiça bizäleşe Fäniä xanımnı ayıruça ozın-ozaq alqışlarğa layıq itte.
Kiçäneñ tağın ber üzençälege iğtibarğa layıq. Zalda çäçäk totıp utıruçılar baytaq bulsa da, säxnägä bäyläm belän menüçelär siräk buldı: Älfiäne, İlhamnı kötep utırğannar ikän. Alarnıñ här cırınnan soñ, ikeşär-öçär keşe säxnä yulın taptadılar. Soñğı yıllarda “zamança” dip atalğan tırt-pırt taqmaqlardan tuyıp, tamaşaçı milli moñıbıznı sağınğandır, küräseñ.
Xäyer, bu festival''neñ töp maqsatı häm mäğnäse dä şul iç. Rifat Fattaxov monı säxnädän dä añlatıp ütte.
Qäderle qunaq – yaqtaşıbız Renat Xaris ta näq şuña borçılıp yazğan poemasınnan uqığan özek tä tirän tä''sirle yañğıradı.
Mäsälän, anı Räşit Wahapovqa bağışlanğan poemasın yazarğa näq şul – milli moñıbıznıñ zamança digän çüp-çar astında qaluı ixtimalına xäweflänü mäcbür itkän ikän. Kiçä barışında isä milli moñ möxiten Räşit Wahapovnıñ tılsımlı tawışı da tulılandıra tordı. Häm şundıy möxittä yäş buın wäkilläreneñ dä baytaq buluı – ayıruça küñelle küreneş.
Xalıq arasında bu Festival''ne oyıştıruçılarğa, ayıruça Rifat Fattaxovqa räxmät süzläre küp yañğıradı. Tänäfestä dä, taralışqanda da.
Ä konsert-tamaşa barça qatnaşuçılarğa da räxmät xatları tapşıru belän tämamlandı. İñ oluğı – Ölkä başlığı Sergey Morozovnıñ Räxmät xatı. Alar ikäw genä: millätebezneñ ğorurlığı İlham Şakirov belän Älfiä Afzalovağa.
Ayrat İbrahim, Sember