3 - 4 yıl elegräk, Sember qalasında nindi genä mädäni çara bulmasın, anı İlmir Nizamov ta bizi ide. Ä “Sember qarlığaçları” digän balalar festivalendä üzeneñ “Şärqıy rapsodiä”sen başqarıp, ul “Oluğ büläk” – “Gran-pri”gä layıq bulğan ide.
Soñğı ber-ike yılda ul kürenmi başladı – Qazan konservatoriäsenä uqırğa kergän ikän. Anıñ äti-äniläre yanına qunaqqa qaytuı äñgämä qorıp alırğa da forsat birde.
Üze äytüençä, cır-moñğa, muzıkağa häwäslege änise Gölüsä xanımnan kilgän. Häm 11 yäşendä änise anı şähärneñ 12-nçe sanlı muzıka mäktäbenä uqırğa birgän. Balanıñ säläten kürep alğan uqıtuçılar, yäş yegetne qış köne – uqu yılı barışında uq, çığarma räweşendä qabul itkännär.
Pianinoda uynağan berençe äsäre turındağı sorawğa ul anı uynap uq kürsätte. Uqıtuçıları här balağa berär närsä icat itärgä quşqannar ikän. Başqalar biremne ütägännär dä tuqtağannar, ä İlmirgä bu eş oşap qalğan häm ul, mawığıp kitep, çın küñeldän şuña birelgän. Şul xäterendä uyılıp qalğan berençe äsären uynap ta kürsätte İlmir.
İñ yaratqan äsäre turındağı sorawğa cawap birä almadı: barısı da minem öçen yaxşı, dip çiklände. Sorawnı ikençeräk quyarğa turı kilde. Qaysı äsäreñne säxnälärdä iñ yış qullanasıñ, digän sorawğa şul uq Şärqıy rapsodiäne atadı.
İlmir Nizamov kiläçägen milli kulturabıznı üsterügä bağışlayaçağın äytte. Çönki, dide ul, urıs muzıkası kiñ tanılğan, bezneke qısılğan, Rusiä külämendä siräk yañğırıy. Urısnıqı kübräk tä, täcribäläre dä bayıraq. Yäş yegetneñ maqsatı, härxäldä, tatar muzıkasın da şul uq däräcägä üsterügä üz öleşen kertü. Tatarnıñ üzençälekle moñı belän dönya xalıqların tanıştıru.
Yäş yeget fikerençä, çit illärdä uqırğa, ostalıqqa öyränergä, täcribä tuplar öçen genä barırğa bula. Anda qalıp yäşäw yaramıy, çönki üz tamırlarıñnan ayırılu ixtimal.
Şul uq waqıtta yäş yeget Sembergä qaytıp urnaşu turında da uylamıy, çönki biredä tieşle şartlar yuq, di. Ä şulay da yaqtaşların da onıtmasqa isäbe. Qazanda täcribä tuplap, nindider däräcägä layıq bulsam, tuğan yağıma da yärdäm itü mömkinlege taba alırmın, dide ul.
Sawbullaşu aldınnan äni keşe – Gölüsä xanım ulı layıq bulğan ike medal'gä dä iğtibar yünältte. Mäskäwdä oyıştırıla torğan yäş kompozitorlarnı barlaw çarası medal'läre alar. İlmir notaların yazıp cibärgän, ä anda uynap qarağaç, äsärlärneñ “tämen tapqannar”. Berençese şul uq “Şärqi rapsodiä” bulsa, ikençese - “Fortepiano öçen syuita”. Äni keşe öçen isä bu äsär tatar gimnı kebegräk yañğırıy. Ul şulay atıy da üzençä.
Ayrat İbrahim, Sember