Tatarstanda ğına tügel – tulayım Räsäy kiñleklärendä dä abruy qazanıp ölgergän “Aq Bars”nıñ Semberdäge filialı 2004-yılnıñ aprelendä açılğan ide. Üz eşen ul keçkenä bülmädä yuridik häm fizik zatlarğa xezmät kürsätüdän başladı. Filialnıñ citäkçese Nuriä Mäcitova SSSR çorında Üzbäkstannıñ bank-kredit sistemasında bay täcribä tuplağan. SSSR tarqalğaç, Sember ölkäseneñ Urta İsäntimer awılında tuıp üskän qız tuğan yaqlarına qayttı häm Rusiä Sberbankınıñ Ul''yan bülekçäsendä üzen yuğarı äzerlekle belgeç itep tanıttı. Häm “Aq Bars” citäkçelegeneñ Ul''yan filialın açqanda näq anı saylawın zur uñış diärgä dä buladır.
Bu bülekçä qısqa ğına waqıt eçendä Sember qalasında yarıysı ğına abruy qazandı. “Ul''yanovskenergo” aksionerlıq cämğıäte, “Avtoray”, “Mişar” kebek säwdä firmaları berençelär bulıp anıñ belän xezmättäşlek itä başladılar. Häm şundıy ozaqqa xisaplanğan kileşü tözüçe firmalar sanı könnän-kön arta bara.
Soñğı arada Ul''yan filialınıñ üz bülekçälären dä oyıştıruı turında işetkäç, monı Nuriä xanımnıñ üzennän açıqlarğa turı kilde.
Çınlap ta, döres ikän. İdel aryağı rayonında – Yaña şähärneñ Lenin komsomolı uramında bülekçä açılğan. Ul şähär xalqınıñ ğına tügel - terälep torğan Çardaqlı rayonı xalqınıñ da iğtibarın cälep itkän. Şul uq arada ölkäneñ ikençe zur şähäre Dimitrovgradta bülekçä açu äzerlänä. Nuriä xanım äytüençä, andağı elekke Agroprombank binasın remontlau turında Qazanda dokumentlar östendä eş alıp barıla. Ölkä üzägeneñ Zasviäj''ye – Zöyaaryağı rayonında da yaña yılğa qädär bülekçä açılaçaq. Bu bülekçälärneñ berençe adımnarı sıyfatında fatir öçen tüläwne qabul itü, zurraq çığımnar taläp itüçe ğämällär öçen aqça tuplawçılarnıñ bulğan aqçasın yuğarı protsentqa alıp, alarğa yärdäm itü, Pensiä fondınnan kilä torğan pensiä aqçaların qabul itü häm kiräk çaqta xucalarına tüläw kebek waq-töyaq ixtiacları da qänäğätländerü küzdä totıla. Artaban zurraq eş ısulları da qullanılaçaq, dide Nuriä xanım.
“Aq Bars” bankınıñ Ul''yan bülekçäse milli tormışnı canlandıruğa da zur öleş kertä. Äytik, Sabantuylarnıñ töp sponsorı – şuşı bank. İdel buyı xalıqlarınıqı dip sanalğan 17-kitapxanägä, yaña ğına açılğan 91-mäktäpkä matdi yärdäme dä sizelerlek. Läkin qayber yumartlıq çağılışların añlap betermäwçelär dä bar. Mäsälän, “Aq qalfaq” oyışmasınıñ Qazanğa, Tuqay-Qırlayğa, Bilärgä äbilär belän säyäxätlär oyıştıru öçen aqça sarıf itüen. Berençedän, äbilärne tügel – yäş buınnı tärbiäläw möhimräk. İkençedän, andıy säyäxätlärne 1988-yıldan birle ük “Tuğan tel” oyışması biletlar satıp oyıştıra kilde.
Qısqası, Nuriä xanım Mäcitova“Aq Bars”nıñ mömkinleklären näq yäş buınğa milli üzañ iñderü öçen qullanırğa tırışaçağın belderde. 91-mäktäp balaları kanikul waqıtında märkäzebez Qazanğa cıyınalar. Yul çığımnarın “Aq Bars” bankınıñ Ul''yan filialı üz östenä alırğa wäğdä itkän.
Ayrat İbrahim, Sember