Äytergä kiräk, yılnıñ berençe atnasında bik küp tanılğan keşelärneñ tuğan könnäre. Aralarında şaqtıy zur yubileyların bilgeläwçelär dä bar. Äytik, yazuçı, şağir, milli xäräkät wäkile Aydar Xälimgä 65 yäş, şul ük könne Tatarstannıñ atqazanğan artistı Äsxät Xismätov ta üzeneñ 55 yıllığın bilgeläp ütte. Tanılğan şağir, cämäğät eşleklese Razil Välievkä isä bu könnärdä 60 yäş tula. Ä menä 3 ğinwar könne Tatarstannıñ xalıq şağire, Ğabdulla Tuqay premiäse lawreatı, dramaturg İldar Yuzeevnıñ tuğan köne. Aña bıyıl 74 yäş tulğan bulır ide. Tağın ber Tuqay isemendäge däwlät büläge iäse – şağir Zölfätkä şuşı könne 60 yäş tuldı.
Dölfät Malikovnı şiğer söyüçelär Zölfät bularaq belälär. Tatarstannıñ Möslim rayonı Yaña Säyet awılında tuğan Zölfät, mäktäpne tämamlağaç Qazan Däwlät universitetınıñ tatar filologiäse bülegendä belem ala. Anıñ ädäbi eşçänlege student yıllarınnan başlanıp kitä. Küp kenä şiğerläre cırğa salına, p'yessaları qurçaq teatrında quyılı. “Mäkerle pesi” isemle berençe tatar balalar operasınıñ libretto avtorı bularaq, Tatarstannıñ Musa Cälil isemendäge bülägenä layıq buldı.
Zölfät bik ozaq yıllar, “Çayan”, “Yäş Leninçı” gäzitendä eşli. Anıñ xezmättäşe yazuçı häm veteran jurnalist Saimä İbrahimova Zölfät turında üz istälekläre belän “Azalıq” radiosı belän dä urtaqlaştı.
“Zölfät belän bez “Yäş Leninçı” gazetasında bergä eşlädek. Şuşındıy ğayät talant iäseneñ üzendä eşläwe belän bu gäzit häm anı uqığan balalar bäxetle buldı. Ul yıllarda gäzit balalarnı nindi genä igelekle eşlär eşlärgä öndämi ide. Şuşı oyıştıruçılarnıñ berse Zölfät ide. Berençedän ul uquçını dulqınlandırğıç şiğerlär belän ruxlandırsa, ikençedän jurnalist bularaq ta qaya kiräk, şunda çığıp kitüe belän dä ezlekle ide. Kosmonavt yanına diseñme, Djani Rodari belän oçraşuğa diseñme. Zölfät iskitmäle keşelekle keşe. Ul härwaqıt yärdäm qulı suzırğa äzer tora.”
Zölfät şiğerlären törle temalarğa icat itä. Äytik, alar tatar xalqınıñ tarixı, tatar mädäniäteneñ yazmışı häm tele, ütkänebezneñ törle faciğäle waqiğaları, mäxäbbät. Şulay uq romantik obrazlılıq, cıynaq kompozitsiä häm tögäl ritmika Zölfät stileneñ töp üzençälege. Ädäbiät belgeçläre isä anı, Hadi Taqtaşnıñ traditsiälären däwam itüçe dip sanıy. Ä şiğer söyüçelär isä anıñ “Yazmışlar yarında”, “Utlı bozlar”, “Adaşqan bolıt”, “İke urman arası” isemle şiğri cıyıntıqların üz itä.
Gölnaz Şäyxetdin