Yaña yıl açıqladı: monısı da mömkin tügel ikän inde. “Muzıkal'' qotlawlar” tapşıruı Yaña yıl aldınnan soñğı märtäbä efirğa çıqtı. Bu tapşırunıñ yuğarı abruyına anıñ alıp baruçısı Ramilä Safina da bik qänäğät ide.
“Tapşırular görläp bara, ğarizalar 2-3 ay elegräk tuplanıp betä ide. Qayber yubilyarlarğa 5 qotlaw kiterälär ide. Tik menä xucalar üzgärde, tapşırularnıñ çeltäre dä üzgärde – anda bezneñ tapşıruğa urın qaralmağan bulıp çıqtı. Mäskäw türäläre bezneñ tapşırular kiräkmi, digännär. Qızğanıç ki, bezneñ başqa millättäge kürşelärebez dä bu tapşırunı tuqtatunı sorap Mäskäwgä xat yazğannar, dip tä äyttelär bezneñ citäkçelär”, - dide Ramilä xanım.
Kanalnıñ cirle citäkçese Vladislav Sovetkinğa “Tuğan tel” oyışması üz waqıtında bu tapşırularnı oyıştırğanı öçen oluğ räxmätlären citkerä kilde. Bu muqşı yegete dä ölkä üzägendä şundıy “to-le-rant-lıq” ğälämätläre barlığın rasladı.
“- Äye, çınlap ta, şundıy xatlar bulğanı mäğlüm. Nişliseñ inde, barçasın da qänäğätländerä almağan tapşırular da bula bit. Ämma eş anda ğına tügel. Möhimräge dä bar: Üzäk televidenieneñ säyäsäte şundıy: töbäklär waqıtın kimetep, Mäskäw waqıtın kübäytü. Monı tapşırunıñ formatına yaraqlaşu häm waqıtnı Mäskäw reklamaların xalıqqa citkerü maqsatında qullanu kiräklege belän añlatalar.
Xällär şundıy: 5-6 yıl çaması elek könenä 3 säğätkä yaqın çaması birelä ide, xäzer - säğät yarım ğına. Anıñ da yartı säğäte genä yaxşı waqıtta birelä. Ä yal könnärendä barı tik yartı säğät kenä. Yal könnärendä birelüçe “Muzıkal'' qotlawlar”ğa säğät yarım birelä ide. Şuña kürä dä bez anı saqlıy almıybız. Min üzem dä monıñ belän qänäğät tügel, läkin nişliseñ inde – kontraktnı ütärgä kiräk.
- Mäskäw böten ilneñ barlıq baylığın suırıp aldı, ni citmi ikän soñ? Nigä yaratqan başqalabız şundıy qomsız ikän?
- Ber ğibrätle urıs täğbire bar: xozyain – barin! Mäskäw ul – xäzer barlıq töbäklärdä dä zur-zur külämdä milekkä iä bulğan barin. Şul isäptän – efirda da. STS kanalı – kompaniä milke. Şulay kilep çığa inde: ul, xucalıq itüçe subyekt bularaq, döres eşli – keremnären arttıra. Şunlıqtan bu xäl döres sanala. Ä qanunnar şulay tözelgän ki, efirğa çığu mömkinlekläre berençe çiratta Mäskäw kompaniälärenä elägä. Häm monıñ belän berni dä eşläp bulmıy. Oşıymı – yuqmı, bez şundıy şartlarda eşlärgä tieşbez.”
STS kanalınıñ direktorları şurası äğzası, cirle tapşırular xucası Vladislav Sovetkin belän Ayrat İbrahim oçraştı.
Ayrat İbrahim, Sember