Ämma prezidentnıñ 70 yıllıq yubileına bağışlanğan kiçä ğäyre räsmi, üzenä kürä ğailä bäyräme tösendä ütkärelde. Älbättä, qunaqlar bik däräcäle, respublikanıñ barlıq töbäklärennän - Tatarstannıñ iqtisat, fän, mäğrifät tarmaqlarınıñ iñ bilgele häm ataqlı wäkilläre, Tatarstannıñ yözen bilgeläuçe häm Şäymiev komandası dip yörtelergә xaqlılar . Anıñ östäwenä ataqlı sänğät'kärlär häm çit illärdän. Federal' üzäktän kilgän qunaqlar härqaysı qotlap süz äytergä laeqlı bulsalar da, mondıy forsat bik az keşelärgä genä nasıyp buldı. Mäcles aldınnan vestibyul'dä Mintimer Şäymievnıñ tormışı, eşçänlege turında foto kürgäzmä quyılğan ide.
Kiçäneñ başında . Prezidentnı tudırıp - üstergän aqtanıştan kilgän fol'klor ansamble cılı qabul itelde. Qotlawçılarnıñ bilgele häm abruylı şäxes buluınnan başqa, qotlaw süzlärneñ ber ğailädä yäşäwçelär kebek samimi häm şayartu belän ürelep baruı Mintimer Şäymievnıñ xolqına turı kilep tordı.
Başqarma häm qanun çığaru xakimiäte wäkilläreneñ iñ yuğarı däräcäleläre Tatarstan әläme tösendäge kiemnärdä säxnägä çığıp Andrey Makareviçnıñ Borılış digän cırı köenä üz qotlawların işetterdelär. Ministrlar kabinetı, Däwlät Sovetı, Prezident apparatı wäkilläre Gonşçik, yäğni maşinada yarışuçılardan torğan prezident komandasın täşkil ittelär. Premyer-ministr Röstäm Minnexanovqa işarä itelgän bu komanda prezidentnıñ tiräsendä yäş häm energiäle keşelärdän torğanlığı kürsätte.
Färit Möxämmätşin prezidentqa arxivtan tabıp kitertelgän kenäz Vladimir häm Bolğar däwläte arasındağı kileşü küçermäsen büläk itte.
Kiçäne Rusiäneñ mädäniät agentlığı başlığı Mixail Şvıydkoy häm Qazan xakimiäte başlığı urınbasarı Zöhrä Niğmätüllina alıp bardılar. Grızlov isemennän Oleg Morozov, Sergey Mironov isemennän Vasiliy Lixaçev qotladılar. Aş östäle artında federal' citäkçelär Yakovlev, Levitin, Fetisov häm başqalar bergä utırsalar da säxnägä finans ministrı Aleksey Kudrin häm mädäniät ministrı Aleksandr Sokolov kütäreldelär.Mintimer Şäymiev äytüençä, finans häm mädäniät ministrlarınıñ duet bulıp çığış yasawları berençe ikän.
Qazan başlığı İlsur Metşin häm başqa rayon, şähär başlıqları muşketerlar kiemendä çığıp d` Artan'yan cırın başqardılar, älbättä, Tatarstan, prezidnetı Şäymiev turında. Axırda alarğa Mäskäwdän kilgän artist Mixail Boyarskiy quşıldı.
Tatar zıyalıları isemennän qaläm iäläre İlfaq İbrahimov, Razil Väliev, Ravil' Fäyzullin, Robert Miñnullin, Rinat Xaris, Tufan Miñnullin çığış yasadılar.
Ataqlı yazuçı häm diplomat Çınğız Aytmatov cil-dawıllı Yevropadan zur awırlıq belän kitä alğan.
Mintimer Şäymiev: “Bezneñ arabızda çınnan da ataqlı häm böyek keşe bulsa, ul - Çınğız Aytmatov ,-dide. Bilgele kinoartist Marat Başarov Mintimer Şäymievkä Boz östendä yoldızlar proektında ciñep çığarğa yärdäm itkän timerayaklar büläk itte häm tırışıp-tırışıp Ğabdulla Tuqaynıñ Tuğan tel şiğeren rus häm tatar tellärendä uqıp birde.
Şunda uq östäl artında Mäskäwdä yäşäwçe tatarlardan Fikrät Tabeev, Şamil Tarpişçev, bertuğan Akçurinnar bar ide.
Ğomumän, bu kiçä waqıtında Mintimer Şäymievneñ qızıqlı häm ziräk şäxes buluı turında ğına tügel, ä tatar xalqı, Tatarstannıñ niçek itep üz yulınnan baruı turında fireklär äytelde. Mäsälän, Yevgeniy Pryamakov İdelbuyı okruğı citäkçese Konovalovnıñ tatarstan häm Şäymiev tersäklär belän dä, aqıl belän dä eş itä belä dip maqtawına ul qarşı çıqtı. Basketbol tele belän äytkändä, dide Pryamakov, Mintimer Şäymievneñ tersäklär belän xäräkät itmi, ul yıraqtan torıp kärcingä ırğıtqan tuplar komandağa 3är oçko kiterä .
Mäclestä Yevropa, Rus häm tatar sänğäte ürnäkläre aralaşıp bardı. Anda Sofiä Rotaru, İğor Butman citäkçelegendäge Big-Bend törkeme, şulay uq Näfqat Niğmätullin, Röstäm Asaev, Röstäm Kahirov, Al'bina Şahimoratova häm başqa bik küplär Tatarstan prezidentına mönäsäbätlären sänğät yärdämendä añlattılar. Piramida tamaşalar zalında bu kiçtä ber ğailä mäclese, respublikanıñ ruxın çağıldırğan bäyräm ütte.
Rimzil Wäli