Küptän tügel genä Şveytsariäneñ Davos şähärendä böten dönya iqtisadı forum tämamlandı. Älege çarada xalıqara däräcädä iqtisadi problemalar, keşelekneñ üseş yulları tikşerälär. Anda törle illärdän kilgän xökümät citäkçeläre, iñ ere banklar, kompaniälärneñ başlıqları, iqtisat belgeçläre, säyäsätçelär qatnaşa. Şuşı zur häm ähämiätle cıyılışta bıyıl berençe märtäbä Tatarstannıñ premyer-ministrı Röstäm Miñnexanov ta qatnaştı. Davosqa barğan Rusiä delegatsiäsen xökümät citäkçeseneñ berençe urınbasarı Dmitriy Medvedev citäkläde. Şulay uq Rusiä wäkilläre arasında iqtisadı üseş ministrı German Gref, ä töbäklärdän isä Röstäm Miñnexanovtan tış, barı tik Sankt-Peterburg başlığı Valentina Matvienko häm Krasnodar ölkäse citäkçese Aleksandr Tkaçev qına bar ide. Tatarstannıñ premyer-ministrı berniçä kön däwamında küpsanlı möhim oçraşular ütkärgän, söyläşülärdä qatnaştı. Räsmi säfärneñ näticäläre xaqında tulıraq itep Azatlıq radiosı tıñlawçılarına Tatarstan premyer-ministrınıñ tışqı iqtisadi eşlär yärdämçese İskändär Möflixanov söyläde.
Mondıy däräcädäge xalıqara çarada Tatarstan berençe märtäbä qatnaşa. Bu säfär bik faydalı buldı. Davosta bu yulı 24 ilneñ citäkçese, törle illärdän 85 ministr, 800dän artıq ere kompaniä, şirkät, bank başlıqları qatnaştı. İñ yuğarı däräcädäge oçraşular uzdı. Röstäm Miñnexanov Meksika prezidentı, Yevropanıñ üzäk bankı xörmätenä kiçke aşta qatnaştı. Şulay uq Tatarstan premyer-ministrınıñ Ukraina premyerı Viktor Yanukoviç belän oçraşuı buldı. Ul yabıq räweştä ütte. Monnan tış, dönyanıñ iñ ere banklarınıñ berse City Groupe, German Gref çaqıruı buyınça British Petroleum kompaniäse, SAS hawa şirkäte wäkilläre, Morgan Stanly investitsion bankı prezidentı belän söyläşülärdä qatnaştı. Qazanda mayda uzaçaq Evropanıñ üseş bankı cıyılışın yaqtırtaçaq Euro Money näşriät yortı wäkilläre belän aralaştı. Älege şäxeslär, wäkillär belän elemtälärne bez kiläçäktä tä nığıtırğa, respublika iqtisatı faydasına qullanırğa, investitsiälär, yaña texnologiälär cälep itü, sänäğätne üsterü öçen faydalanırğa uylıybızDavostağı cıyın tatarstan wäkillärenä törle möhim oçraşular, söyläşülär belän genä tügel, ä şundıy zur çaralarnı oyıştıruda täcribä cıyu yağınnan da bik qızıqlı bulğan. İskändär Möflixanov däwam itä.
Davos forumı bik qızıqlı itep oyıştırılğan. Anda keşelär eşlekle oçraşularda ğına tügel, furşetlar, aş östäle artında da aralaşa, tege yäki bu mäs’älä belän qızıqsınuçı qunaqlar ber-berse belän söyläşä, fikerläşä. Yäğni, monda törle cıyılışlar, seminarlar belän berrättän, räsmi bulmağan aralaşu, tanışu da bara. Bälki kiläçäktä bez dä elemtälär buldıru häm çaralar oyıştırunıñ şundıy ısulların Tatarstanda da qullanırbızRespublika citäkçelege şulay itep xalıqara däräcädä dä elemtälären nığıta, eşçänlegen arttıra. Menä Mintimer Şäymiev tä çärşämbe kiçendä Törkiägä kitärgä cıyına. Tatarstan prezidentı İstanbulda Rusiä - Islam dönyası digän strategik küzallaw törkeme cıyılışında qatnaşaçaq. Rusiäneñ möselman dönyası belen araların yaxşırtu maqsatında tözelgän fikerläw törkeme utırışı 1-2 fevral’dä uzaçaq.
Gölnaz İlgizär