Bu könnärdä respublika xökümätendä ber qızıqlı kadr üzgäreşe buldı. Tatarstan Ministrlar kabinetınıñ mädäniät häm tellärne üsterü bülege citäkçese bilgelände. İsegezgä töşeräbez, älege bülekneñ elekkege başlığı Kim Miñnullin Ğalimcan İbrahimov isemendäge Tel, ädäbiät häm sänğät institutı citäkçese bulıp kitte. 17 marttan başlap isä, älege bülekne Kamal teatrınıñ artistı Ramil Töxwätullin citäkliäçäk. Anı inde respublikanıñ premyer-ministrı Röstäm Miñnexanovqa da täqdim ittelär. Äytergä kiräk, Töxwätullin säxnädä uynawdan tış, Tatarstan-Sinema dip atalğan kino sänğäten üsterü waqıfı prezidentı, Ramay studiäse general’ prodyuserı da. Ul Upqın, Zöläyxa fil’mnarın, Ana bäyräme animatsion fil’m töşerüçe dä. Xäzer isä Ramil Töxwätullin respublika xökümätendä mädäni häm däwlät telläre mäs’älälären xäl itäçäk. Şuşı yünäleştä sez närsä eşlärgä uylıysız, digän sorawğa Azatlıq radiosına ul menä närsä dip cawap birde.
Bu täqdim miña oçraqlı ğına yasalmağandır dip uylıym, dimäk alar minem kreativ qaraşıma, yañalıqqa moxtac. Plannarğa kilgändä, alar minem plannar bik küp anısı. Läkin äle barısın da aldan äytep quyıp bulmıy. Min bit 17 marttan ğına eşli başladım. Älegä min wazğiätne öyränäm, eşlär belän tanışam. Läkin ğomumän alğanda, üz wazifalarımda min sänğät ölkäsen üsterügä töp iğtibarnı yünältermen, dip uylıym. Çönki andağı xällärne min bik äybät beläm. Tel mäs’älälärenä dä iğtibarnı arttırırğa kiräk Alda torğan zur eşlärgä äzer bulsa da, Ramil äfände teatr häm kino belän dä sawbullaşırğa cıyınmıy.
Min kinonı da, teatrnı da taşlarğa cıyınmıym, ul eşlär inde cayğa salınğan. Säxnädä uynıy torğan bar rol’lärdä dä mine kürergä mömkin bulaçaq. Minem töp eşem Ministrlar Kabinetında bulsa, can azığım, ruxi azığım teatrda bulaçaqSez Kamal teatrınıñ bilgele artistı, ä xäzer inde Tatarstan Ministrlar kabinetınıñ mädäniät häm tellärne üsterü bülege citäkçese dä Ramil Töxwätulinnı işettegez.
Gölnaz İlgizär