Bu xalıqara fänni-ğamäli konferensiä Tatar milli teatrınıñ 100 yıllığı uñayınnan oyıştırılğan teatrlar festivaleneñ soñğı könendä ütte. 27- sendä Xalıqara teatrlar könendä Ğäliäskär Qamal isemendäge tatar däwlät akademiä teatrında Tatar teatr sänğäteneñ 100 yıllığına bağışlanğan tantanalı kiçä bulaçaq.
Tatarstan premyerı urınbasarı, mädäniät ministrı Zilä Wälieva, Tatar milli teatrınıñ 100 yıllığı ruxıy tormışıbız waqiğası ğına tügel, ä ictimaği säyäsi tormışıbızda da zur ähämiätkä iä, dide.
Bezneñ respublika tatar teatrı ruxında yäşi. Görläp tatar teatrlarınıñ festivale ütte. Qazanda ütkän bu festival'dä barısı 11 teatr qatnaştı. Bügenge fänni konferensiä ber yaqtan bäyräm çaralarınıñ berse bulsa, ikençe yaqtan bäyrämne yaña däräcägä kütärep, yaña uylanular uyatır dip uylıym.
Tatarstan Fännär akademiäseneñ vitse - prezidentı, ğalim Mirqasıym Ğosmanov, teatr milli üzençälekne, ruxlıy äxlaqnı, mädäniätne, tuğan telne saqlawğa, üsterügä zur öleş kertkängä min üzemneñ çığışımnı tatar telendä yasıym, dip belderde.
Tatarça kitaplarnıñ sannarı, tirajları yıldan yıl azaya, waqıtlı matbuğat eşçänlege dä gel sayığa barğan yıllarda teatr häm säxnä sänğätebezneñ görläp eşläwen, tamaşa zallarıbıznıñ härwaqıt tulıp torğan buluın da onıtmıyq. Tatarstannan çittäge şähärlärdä gastrol'lär barğan waqıtta niqädär xalıqnıñ teatr işeklärenä yabırılu faktların da iskä töşerik. Almatı, Taşkent häm başqa şähärlärdä monnan çıqqan kitaplardan nibarı distägä yaqın nösxä aldırıp, alarnı da sanawlı keşelär uqıy ide. Gastrol'lär waqıtında spektakl'lärne meñlägän keşe qarap, tuğan sänğätkä, tuğan telgä yaqınlaşu omtılışı bula ide. Çit şähärlärdä ayırım-ayırım urnaşqan, üz ğailäläre qabıqlarında yomılıp yäşärgä mäcbür bulğan millättäşlärgä şundıy kiçälärdä oçraşu, aralaşu, tanışu mömkinlege dä tua ide.Mirqasıym Ğosmanov, üz çığışı waqıtında çit töbäklärdä yäşäwçe millättäşlärgä mondıy bäyrämnärgä qatnaşu siräk nasıyp bula ide. Ä xäzer isä, bigräk tä, dip assızıqladı.
Mäskäw qunağı sänğät fännäre doktorı, professor Boris Poyurovski Marsel' Sälimcanovnıñ teatr-yortı turında çığış yasadı. Başqa kürenekle teatrlarda äydäp barğan şäxeslärneñ cannarı baqıy dönyağa küçkäç, mäktäpläre däwamçıları bulmağanğa cimerelde. Ğäliäskär Qamal isemendäge tatar däwlät akademiä teatrında bik küp teatrlardan ayırmalı bularaq Marsel' Sälimcanov üz eşen däwam itüçene äzerläp qaldıra aldı dip yuğarı bäye birde.
Plenar utırışta süz Tatar teatrınıñ Üzbäkstan säxnä sänğätenä yoğıntısı, Qırım tatar teatrınıñ üseşe häm barlıqqa kilüe turında da bardı. Annan soñ teatr belgeçläre, ğalimnär üzläreneñ çığışların milli dramaturgiä, tarix häm zaman, säxnä bizäleşe häm millätara mönäsäbätlär büleklärendä däwam ittelär. Anda 35 fänni çığış uqıldı. Bu xalıqara konferensiädä Qazan, Mäskäw, Taşkent, Aqmäçet, Ufa, Almatıdan teatr belgeçläre qatnaştı.
Nail Alan