Çärşämbe könne Qazan üzägendä yörüçelär üzlären Qıtayda dip xis itkännärder, möğäyen. Çönki yortlarda älege ilneñ alämnäre elengän, şat sayın qıtay telendä yazular urnaştırılğan. Qazan menä şulay itep Xu Tsintaunıñ Tatarstanğa räsmi säfärenä äzerlände.
Qıtay başlığı häm anıñ citäkçelegendäge küpsanlı wäkileçelek Qazannıñ hawa alanına sişämbe kiçendä kilep töşte. Qıtay başlığın qarşı alırğa Mintimer Şäymiev belän bergä küp kenä respublika citäkçeläre cıyıldı. Kilüçelär çınnan da küp ide, Tsintau belän ber oçqıçta ğına da 120dän artıq keşe kilde. Monnan tış, cäfär waqıtında respublikada küp kenä qıtay eşmäkärläre, eşquarları, sänğät ähelläre buldı.
28 mart, çärşämbe könne, Xu Tsintau Qazan belän tanışıp yörde. Aña Qazan däwlät universitetın kürsättelär, studentlar belän küreşterdelär. Däräcäle qunaqnı Tatarstan prezidentı üze ozatıp yörde. Monnan tış, Xu Tsintaunı xalıqara at sportı kompleksına alıp bardılar. Maxsusu oyıştırılğan kürgäzmädä ul Tatarstannıñ iqtisadi mömkinlekläre, respublika citeşterüçeläreneñ tawarları belän tanıştı. Qıtay wäkileçelegen qarşı alıp, respublikanıñ iqtisadi mömkinçeleklären täqdim itü öçen Tatarstannıñ iñ ere sänäğät şirkätläre cälep itelde.
Şulay itep, Tatarstan citäkçelege Qıtay wäkilçelegen bik cılı qarşı aldı häm älege il belän xezmättäşlekne üsterü öçen bik küp eşläde. Ä nigä soñ Xu Tsintau Rusiäneñ başqa töbägenä tügel, ä näq menä Tatarstanğa kilde digän sorawğa, respublika premyer-ministrınıñ iqtisadi eşlär yärdämçese İskändär Möflixanov bilay dide.
“Bezneñ cömhüriätebez böten çit iilär belän xezmättäşlege bik açıq. Bez böten yaña kompaniälär, bexnologiälär belän dä qızıqsınabız. Başqa Rusiä regionnarı belän çağıştırğanda Tatarstan böten mäs'älär buyınça iñ berençe urında bara. Qıtaylarnıñ bezgä berençelärdn kilüe bik zur ähämiätkä iä. Çönki här regionğa, här ilgä mondıy däräcäle keşelär gel kilmilär. Xäzer törle ölkädä xezmätteşlek turında söyläşülär bara.”
Xäyer, Tatarstannıñ qıtay belän xezmättäşlekne üsterü mömkinlekläre äle şaqtıy. Çönki Qıtay respublikanıñ säwdä partnerları arasında barı tik 17 urında ğına tora. Xäyer, monda bezneñ ğäyep kenä tügel, Qıtay şaqtıy däräcädä yabıq il ide, di İskändär MÖflixanov. Läkin xäzer anda reformalar, törle üzgäreşlär bara, Qıtay başqalar öçen açıla bara, şuña alarnıñ Tatarstan belän dä xezmättäşlege artaçaq, digän fikerdä tora respublika premyer-ministrınıñ iqtisadi eşlär yärdämçese İskändär Möflixanov.
28 mart kiçendä Xu Tsintau üzeneñ Rusiägä räsmi säfären tämamlap, Qazannan Pekinğa qaytıp kitte. Läkin aña almaşqa tatarstanlılarnı Qıtay mädäniäte belän tanıştırırğa başqalağa Qıtay däwlät biü ansamble kiläçäk. Alarnıñ çığışı 1 mart könenä bilgelängän.
Gölnaz İlgizär