Comğa könne Tatarstannıñ Norlat rayonında tuıp üskän 19 yäşlek Fail Qaweevnı cirlädelär. Fail Sankt-Peterburgnıñ xärbi-diñgez institutında belem alğan häm älege uqu yortı cirlegendä asılınıp ülgän. Qazandağı keşe xoquqların yaqlaw üzäge xäbär itkänçä, faciğä 23 mart könne ük bulğan. Failneñ änise äytüenä qarağanda, bu könne irtän Fail yörgän qızına “Minem üläsem kilä, tüzär çamam qalmadı” dip sms xäbär cibärä. Bu xäbärne alğan qız köne buyı yegetkä şaltırata, ämma ul telefonına cawap birmi. Faciğä bulası köngä qädär barsı da äybät bulğan, yäşlär ärläşmägän, caylap qına söyläşkännär. 23 könne ulınıñ wafat buluı turında anağa Fail belän bergä uquçı Rostov ölkäsennän ber yegetneñ änise xäbär itä. Şunnan son inde ana üze xärbi uqu yortına şaltıra. Anda çınnan da malayınıñ ülgän buluın raslıylar. Faciğädän soñ ata-analar, malayları uqığan uqu yortına baralar. Monda alarğa, inde berniçä kön däwamında Failneñ däreslärdä azat itelüen äytälär. Yeget böyerlärendäge awırtuğa zarlanğan bulğan. Failneñ änise isä, Qazandağı keşe xoquqların yaqlaw üzägenä yärdäm sorap möräcäğät itkän. Ayırım alğanda, bu oçraqta da yegetne üze-üzenä qul saluğa kitergän säbäplär bar dip farazlana.
Gölnaz Şäyxetdin