Nijgarda bulırğa tieş Rizasızlar marşına Sember yäşläreneñ, militsiä oyıştırğan provakatsiä arqasında, bara almawları turında xäbär itkän idek inde. Ä menä Nijgarga cıyınmağan Mönir Nasıyrovnıñ da totqarlanuı säbäbe mäxkämädä genä açıqlandı. Lenin rayonı militsiäse anıñ tärtip bozuı turında protokol tözegän ikän. İmeş ul, röxsätsez, yäğni qanunsız şestviedä qatnaşqan häm militsiägä qarşılıq kürsätkän.
“Mirovoy sud” digäne martnıñ 30ында bulırğa tieş ide. Anda qatnaşırğa dip 9 xoquq saqlawçı da teläk beldergän ide. Läkin sud'ya Svetlana Çebuqina berkemne dä kertmäde. Ul Mönir belän genä eş itärgä cıyınğan ikän. Şahitlär kiräkmi, imeş. Ğayıplänüçe mondıy sudta qatnaşmayaçağın beldergäç, Çebuqina sudnı 4-aprel'gä küçerde. Mönir Nasıyrov fikerençä, täp-lyap 500 rubl'lek ştraf salırğa bulğan ul. Änä bit şul uq piketta qatnaşqan Aleksandr Toroşçinğa 500 sum çäpegännär, di ul. Häm şul uq Çebuqina. Sud Qararında anıñ 1-nçe märtäbä xoquq bozuın isäpkä alıp, iñ keçkenä ştraf salınuı da assızıqlana.
Bu oçraqta isä şahitlärne kertü–kertmäw turında sud'ya xanım “östägelär” belän kiñäşläşergä bulğan, küräseñ. Häm aña döres kiñäş birgännär kebek. 4-aprel'dä uzğan sud Administrativ xoquq bozu turındağı eşne tuqtatırğa qarar qıldı. Dimäk, militsiä Nasıyrovnı xaqsız cäberlägän bulıp çığa. Qara sin anı, dilär çaqırılğan şahitlär, başbaştaqlıqnı töp eş ısulına äyländergän militsiäneñ dä xaqsızlığın isbat itep bula ikän. Kümäkläp totınsañ ğına inde, älbättä.
Berençedän, Nasıyrov şestviedä qatnaşmağan, çönki mondıy çara üze ük bötenläy bulmağan. Barı tik ikeşär-öçär keşelek törkemnärneñ ştablarına piketta qullanılğan şiğar-flagların qaytarunı, nigäder, Şestvie dip atağan militsiä. İkençedän, militsiä xezmätkärläre aña üzläre bäylängännär – ber dä yuqqa maşinağa köçläp utırtqannar.
Öçençedän, kamerada 24 säğät totqannar, ämma anı aşatu turında uyları da bulmağan. Häm iñ möhime - şahit Andrey Mixaylin ölkän leytenant Xvoynitskiynıñ süzlären kiterde: “Sin kitä alasıñ, ä minem östän prokurorğa şiqayät yazğanı irtängä qädär utırır äle”, digän süzlärne.
Çınlap ta, Mönir Nasıyrov bu leytenantnıñ üzen qıynawı turında prokurorğa şiqayät yazğan bulğan. Xvoynitskiyğa ällä ni cil-yañğır timägän – eşendä qaldırğannar bit änä. Läkin şul cäzäsızlıq anı tağın da därtländerep cibärgän, küräseñ. Şiqayätlär yazu turında başına uy da kilmäsen, dipme, ällä üzeneñ östenlegen kürsätü öçenme – Nasıyrovtan üç alırğa bulğan, dip farazladılar piketçılar.
Bu qinaş 2005-yılğı Sabantuydan soñ bulğan. Bäyräm barışında “Bolğar yañarışı” oyışması “Qol Ğali häykäle kiräk” dip xakimiätkä yazğan möräcäğätkä imzalar cıyu belän mäşgul' ide. Mönir Nasıyrov ta şular belän. Tik, nigäder, militsiä bu eşne tuqtattı häm şiğar'lären militsiägä alıp kitte. Häm moña qarşılıq kürsätkän Nasıyrovnı da. Ğadelsezleklärne kürä almağan xisçäñ keşe bularaq, ul militsiäneñ xaqsızlığın isbat itärgä totınğan. Häm şul Xvoynitskiy tarafınnan qıynalğan da.
Bälki, Mönirneñ şiqayäte aña uñaysızlıqlar da tudırğandır. Başqaça şunıñ öçen 2 yıl buyı açu saqlawın añlap ta bulmıy. Ämma barıber militsiädä xezmät itä bit äle: cil-yañğır timägän kebek. Ä Nasıyrovnı isä Xvoynitskiynıñ xalıqnı böcäktäy sanawı aptırata. Xäyer, bu leytenant qına tügel – sisteması şundıy bit. Alay bulmasa, Nasıyrov şiqayäte arqasında şul uq leytenantnı pogonsız da qaldıru mömkin bulır ide. Monısı inde - soñğı sudta şahidä Natal'ya xanım Ryabseva awızınnan yañğırağan fiker.
Ayrat İbrahim, Sember