10 aprel'dä Tatarstan başqalasına Altay respublikası Däwlät cıyılışı – Äl Qorıltay delegatsiäse qunaqqa kilde. 4 delegat Qazanda 4 kön bulaçaq. Şuşı könnärdä alar respublikanıñ Däwlät Şurası eşçänlege belän tanışıp üzara täcribälär urtaqlaşıp yördelär. Vizit barışında Altay respublikası qunaqları Qazan belän tanışaçaq. Qamal teatrında spektakl' qaraw da qaralğan ide.
Altay qunaqları Qazanğa sişämbe tönlä kilä. Alarnı “Qazan” xalıqara hawa alanında Tatarstannıñ däwlät şurası äğzaları qarşı alar da Qazannıñ üzägendäge yaxşı ğına “Suleyman Palas” qunaqxanäsenä urnaştıralar. 11 aprel'dä irtänge aştan soñ Altaylılar Tatarstannıñ Däwlät Şurası binasına kildelär. Respublikanıñ qanunnar tikşerü üzägeneñ muzeen qarap çıqqaç alar räsmi qabul itü bülmäsenä tuqtaldılar. Anda Tatarstannıñ Däwlät Şurası räiseneñ urınbasarı Aleksandr Gusev citäkçelegendäge törkem kilgän qunaqlarnı ber östäl artına utırıp söyläşergä çaqırdı. Qara-qarşı utırıp söyläşüdä başta Tatarstan üzeneñ bulğan uñışların atap çıqtı. Sport, awıl xucalığı, iqtisat, mädäniät ölkäsendä söyli alırlıq äyberlärne barsında qısqaça maturlap söylädelär.
Şunnan Altay respublikası Däwlät cıyılışı- Äl Qorıltay räise İvan Belekov süzgä quşıldı.
Ul şulay uq üz yaqlarında turizmnıñ üseştä buluın äytep ütte. Mädäni çaralarında törki xalıqlarnıñ traditsiäläre dä çağılış taba ikän. İvan Belekov tatar telenä oxşaş cır süzläre dä söyläp aldı.
Altay respublikası turında süz alıp barğanda, Altay ölkäse dä küz aldına kilä. Bıltır cäy aylarında internetta, “Vedomosti” gazetası saytında Altay respublikası belän Altay ölkäsen quşalar, 2008 yılğa alar ber töbäk bulıp sanalırğa mömkin digän xäbärlär kürende. Läkin şul “Wedomosti”nıñ küzätüçeläre äytüençä bu bulu mömkin tügel, cirle xalıq quşıluğa qarşı dip belderälär. Şuña kürä bügenge köndä Altay respublikası üz köçen saqlıy birä, telägän töbäk belän oçraşularğa, qunaqlarğa bara. Tatarstanğa da alar bik teläp kildek dilär. Parlamentları da 41 deputat belän yäşäwen däwam itä. Däwlät telläre bulıp altay, rus tele sanala. 11 munitsipal' berämlek Altay respublikasın ber böten itä di annan kilüçelär. Tatarstanlılar belän Altaylılarnıñ qara-qarşı utırıp söyläşüdä qatnaşqan Tatarstan däwlät şurası deputatı Razil Wäliev Tatarstannıñ Altayğa yasağan büläge turında da iskä aldı.
Razil Wäliev Altay respublikasınnan kilgän qunaqlarnı başqalanıñ uñışları belän comğa köngä qädär tanıştırunı däwam itäçäk. Respublikanıñ Däwlät Şurasındağı delegatlar belän ğap' qoru ber-bersenä istälekle büläklär birü belän tämamlandı. Comğa Altay respublikası qunaqları Tatarstan prezidentı belän oçraşıp kire tuğan yaqlarına kitäçäklär ikän.
Röstäm İsxaqi
