Cırnıñ yırtığı yuq disälär dä, baqsañ Rezidä Qadıyrova başqarğan “Özgälänmä üzägem” digän cır qayberäwlärneñ küñelenä xuş kilmiçä, saruın qaynata ikän. Bulmas. ru internet säxifäsendäge anti - xit paradındağı naçar cırlar isemlege moña dälil bulıp tora. “Radionı niçä tapqır yalğasañ da Rezidä Qadıyrovanıñ, "YALLA" törkeme repertuarınnan alınğan cırın äyländerälär. Närsä ällä yun'le cırlar betkänme? Ällä tamaşaçı gel şul Rezidäne genä sorıymı? Tağın Läylä Däülätovanıñ "Finskaya pol'kası" bar. Üleş... Ä Rezidä Şäräfievanıñ "Ex, polkovnik" digän cırı - Maşa Rasputinağa parodiä... qotoçqıç parodiä!..” digän süzlär säxifädä bu bäygegä iğtibarnı cälep itep tora.
Bu tatar cır sänğäten yaña basqıçqa kütärü. Çönki normal' cämğiättä mondıy äyberlär bar. di älege çaranıñ maqsat turında “Üzebez” yaña buın yäşlär xäräkäte wäkile Räfis Cämdixan.
Bu mısqıllaw dip kenä qabul itelergä tieş tügel. Bu sıyfat mäs’äläsen dä kütärü. Ciñüçelärne bez bu bäygeneñ yomğaqlawına tönge klublarnıñ bersenä çaqırabız. Anda alarğa büläklärne biräbez. Yevropada, urıs estradasında moña kilälär. Beznekelär moña äzerme, yuqmı belmim. Kimläwläre dä mömkin. Kilmägän oçraqta bezneñ niät artistlarnı şul cırçılarça kienderep çığarıp, şularğa tapşıru, parodiä räweşendä. May axırına qädär bu däwam itäçäk. Qazannıñ tönge klublarınıñ bersendä büläkläw bulaçaq. Kemnär büläk alğannı "Molodej' Tatarstana", "Käyef niçek" gazetası da xäbär tiergä cıyına. Büläkkä kilgändä isä?
Qorığan äyber, Qorğan botaq, qorğan ağaç ul ğämäldän çıqtı digänne añlata, yäğni yäşäwe yuq. Mondıy naçar cırlar da ğämäldän çığarğa tieş digän mäğnä salınğan moña. İkençedän, urıslarda “Serebryanaya galoşa” digän äyber bar. İctimaği başlanğıçta “Altın bars”, altın-kömeştän bulğan büläklär birä almıybız. Yaz citte. Qorğan botaqlar kübäyä. Maturrağın kisep alıp, şunı şomartıp büläk itergä niät. di Räfis Cämdixan. Älegä bu çara turıda küplär belmi. Anti- xit parad oyıştırılu turında bu cırlarnı äyländerüçe FM radiolar da söylämi. Gazetalar da läm-mim. “Bez press-relizlar äzerlädek, şuşı arada alarnı mäğlümlät çaralarına cibäräçäkbez”,- di äñgämädäşebez. Ä bäygegä cırlar kilä tora ikän.
Tatar FM radiolarda yañğırağan, könenä 50 tapqır qabatlanğan cırlar kilä. Şular arasında Rezidä Qadıyrovanıñ da cırları bar, Salawat abıynıñ da cırları bar. Häm bik küp törlelär kilä tora. Telägän keşe SMS cibärep tä tawış birä ala. Tege, yäki bu cırğa. Urıslarda, yäisä Yevropada anı bit däräcäle radiolar oyıştıra. Bez iğlan itkäç, qayber radiolar, qayber şirkätlär moña qızıqsınu belderdelär. Läkin, bez äyttek, kiläse yılğa teläsägez üzegez oyıştırığız. Tatar cır sänğätendä naçar cırlar bäygesen oyıştıruçılar üzläre dä bu yaña başlanğıç ber törle genä qabul itelmäs dip uylıy. Şuña kürä, Bulmas ru säxifäsenä dä “Xörmätle cırçılarıbıznıñ bezgä räncemäwlären ütenäbez!”,- dip yazıp quyğannar.
Nail Alan.