Tatarstannıñ ut kürşe buluı arqasında Sember ölkäseneñ qala-salalarınnan märkäzebez Qazanğa ekskursiälär oyıştıruı ğädäti küreneşkä äylänep bara inde, şöker. Ä menä Çardaqlı rayonınıñ Ürän awılı mäktäbeneñ ana tele uqıtuçısı Älfiä Alimova oyıştırğan säyäxätne “ğädäti” dip atap bulmıy. Mäğnäwi yaqtan da, oyıştıru ısulı buyınça da. Ğädättä, balalar äti-äiläre aqçası xisabına säyäxät qılalar. Bu yulı – ŞÄXSİ xezmät quyıp! Älfiä xanım Çardaqlı rayonı ana tele uqıtuçılarınıñ metodik berläşmäsen citäkli. Säyäxätkä kandidatlar uquçılar arasında ana tele häm tatar tarixı buyınça bäygelär näticäsendä bilgelänä. Näticädä rayonnıñ 3 iñ zur awılınnan 40 bala tuplanğan. Ä aqça mäsäläsendä “Aq Bars” bankınıñ Ul'yan filialı citäkçese Nuriä xanım Mäcitova yärdämgä kilgän.
Ayrat İbrahim, Sember