Putin Medvedev häm käbestä şulpası turında

Mäğlüm ki, Rusiälär tağın ike atnadan ilneñ yaña prezidentın saylayaçaq, şuña da Vladimir Putinneñ bügen Kremldä uzğan matbuğat oçraşuı anıñ prezident bularaq ütkärgän soñğısı ide, diärgä mömkin .

Bu oçraşuda da Putin üzeneñ "xakimiätkä yabışıp yatmawın" häm berqayçan da prezidentlıqta öçençe märtäbägä dä qalırğa telämäwen äytte. Üzeneñ şuşı pozitsiäsen yaqlap ul Kremldäge urınğa yaqın xezmättäşe Dmitri Medvedevnı täqdim itüen häm aña tulısınça ışanuın belderde. Ul xätta "bezneñ arada şäxsi ximiä dä bar, il belän idarä itü dilbegäsen aña birü oyat tügel", digän süzlär äytte.

Putin berük waqıtta Medvedev qulı astında xökümät citäkçese bularaq eşlärgä äzer buluın da äytte, ämma başta monıñ öçen Medvedevnıñ prezident itep saylanuı häm anıñ miña bu wazifanı yökläwe şart, dip belderde.



Ser tügel, mondıy kiñküläm oçraşular waqıtında Putin yış qına onıtılıp kitep mikän inde, ällä eçtäge xislären yäşerä almıy ğınamı, şaqtıy qızıqlı belderülär yasıy. Bu yulı iğtibarnı şul cälep itte - il eçendäge problemalar, üzeneñ qazanışları turında sorağanda Vladimir Putin bik yomşaq, här süzen ülçäp, xätta ğorurlıq xise belän cawap birde.

Ä inde xalıqara mäs'älälär, bigräk tä Rusiäneñ Könbatış belän mönäsäbätlärenä, ike aradağı yaña kierenkelekkä kilgändä - saylaw mäs'äläseme ul, ällä inde Yewropada raketa qalqanın qorumı - Putinnän şaqtıy qırıs, häm urını belän xätta vulgar süzlär işetelde.

Elekke yıllarda küplär anıñ Çeçnä temasın kütärügä yarsıp kitüen kürä ide, xäzer inde ul Kosovonıñ bäysezlegenä dä, ayırım däwlät bulğan Ukrainanıñ NATOğa quşılırğa teläwenä dä, Quşma Ştatlarnıñ häm Yewropadağı qayber illärneñ, şulay uq Mäskäwdän bäysez illärneñ yaña raketa qalqanın qoru niätenä bik açulanıp qarıy.

Atnakiç anı çığırınnan bigräk tä Yewropada iminlek wä xezmättäşlek oyışmasınıñ Rusiä saylawına üz küzätüçelären cibärü planı häm şunıñ tiräsendä kilep tuğan wäzğiät çığardı. Putingä bu oyışmanıñ küzätüçelärne ber ilgä ber sanda, ikençe ilgä başqa sanda cibärüe, ä qayberlärenä isä bötenläy cibärmäwe, yäisä kiresençä, tawış birüne niçek oyıştıru kiräklegenä öyrätüe oşamıy. "Bezne öyrätkänçe xatınnarın käbestä şulpası peşerergä öyrätsennär", dip qırt kiste Putin bu uñaydan.

Rusiä prezidentınıñ ildäge saylawnı ğadel oyıştıru kiräklegen käbestä aşın peşerä belügä tiñläwen işetü härxäldä qızıq buldı.

Bälki prezident Putin çınnan da tizdän üzeneñ şuşı yuğarı wazidafadn kitüen añlap, üz fikerlären inde irekleräk belderergä, eçtän uylağannarın bik yäşerep tormasqa bulğandır. Ul monı uzğan atnada da yaxşı kürsätte - moña qädär süzdä genä bulsa da Tatarstan häm tatarlarğa qarata yaxşı mönäsäbäten qabatlap kilsä, Däwlät Şurası utırışında yasağan çığışında Tatarstanğa kötelmägän häm şaqtıy köçle höcüm belän çıqtı, anıñ 90-nçı yıllarda Rusiä belän araların maxsus kileşü aşa qoru niäten "başqa sıymaslıq" ber närsä dip atadı.