Buxarest sammitında Albaniä belän Xorvatiä NATOnıñ Äğzalıq planına quşılır, ä Gruziä belän Ukraina aña möräcäğät iter dip kötelä. Bu plan alyansqa quşılu yünäleşendä berençe adım sanala.
Rusiä prezidentı Vladimir Putin Buxarest cıyınında xörmätle qunaq bulaçaq. Gärçä, Rusiä-NATO mönäsäbätläre bügen iñ tübän däräcädä, di belgeçlär.
"NATO-Rusiä mönäsäbätläre bügen iñ tübän däräcädä. - di bäysez xärbi belgeç Vladimir Litovkin. - Törle säbäplärdän. Moña Rusiä genä tügel, NATO üze dä ğayeple. Ul yış qına Quşma Ştatlarğa iärep Rusiäne köçäyä barğan köndäş itep kürä."
Rusiäneñ yaña saylanğan prezidentı Dmitriy Medvedev uzğan atna Financial Times gäzitenä birgän äñgämäsendä, Gruziä belän Ukrainanıñ NATOğa kerüe Yewropadağı iminlekne qaqşataçaq dide.
Tışqı eşlär ministrı Sergei Lavrov, düşämbedä İzvestiä gäzitendä basılğan äñgämäsendä, Könbatışnı bu ike elekke sovet ilen NATOğa süräp kertüdä ğayepläde.
Mäskäw AQŞnıñ Çexiä belän Polşada raketa qalqanın urnaştıru niätenä dä qarşı çığa. Waşington anı İran kebek illärgä qarşı dip añlatsa da, Mäskäw ışanmıy, üzenä qarşı dip qabul itä.
Borçular urınlımı?
Mäskäwneñ bu borçuları ni däräcädä urınlı, NATO Rusiägä xärbi qurqınıç tudıramı?
"Minemçä, problema xärbi ölkädä tügel, - di Atnalıq jurnal isemle internet basmasınıñ xärbi belgeçe Aleksandr Golts. – Bu tışqı säyäsät häm xättä psixologiä mäsäläse."
2000 yılda prezidentlığın başlağanda, Putin kürşelär belän mönäsäbätlärne yaxşırtunı tışqı säyäsättä töp maqsatlarınıñ berse digän ide. Çınbarlıqta alay bulıp çıqmadı, di belgeç.
"Ukraina häm Gruziäneñ NATOğa omtıluı bu säyäsätneñ yañağına suğu. - di Aleksandr Golts. - Bu ike il başqa qimmätlär sayladı, alar arzan yağulıq xisabına yaxşı enekäş bulıp qılanırğa telämi."
Uzğan yıl Münxenda yasağan çığışında Putin Quşma Ştatlarnı ixtiarın bar dönyağa tağuda ğayeplägän ide. Anıñ bu çığışın salqın suğış çorı çığışı belän çağıştırdılar.
Belgeçlär fikerençä, bu atnada Buxarestta Putin, salmağraq söylärgä tieş. İke möddät prezidentlığı axırında ul işekne şapıldatıp yabıp kitergä telämiäçäk.