Yabıq işeklär artında ütkän bu utırış, aldan kötelgänçä, näticä birmäde. Quşma Ştatlar, Britaniä, Fransiä häm Germaniä Mäskäwne Abzaxiä häm Könyaq Osetiä belän tığız elemtälär urnaştıru niätennän waz kiçergä öndäde. Rusiä wäkile bu öndäwlärne kire qaqtı.
"Bezneñ ğamällär xalıqara kileşü häm qanunnarğa qarşı kilmi. Alarğa niçek zarlanıp buladır, bez añlamıybız" – di Vitaliy Çurkin.
Uzğan atna Rusiä prezidentı Vladimir Putin Gruziäneñ bu ike töbäge belän säwdä bäyläneşen nığıtırğa, andağı qayber oyışmalarnı räsmi tanırğa çaqırğan ide.
Bu töbäktä yäşägän xalıqnıñ kübeseneñ qulında Rusiä pasportı. Xäzer Mäskäw üzeneñ säyäsäten bu watandaşlarnı saqlaw kiräklege belän añlata.
Ämmä BMOdağı Gruziä wäkile süzlärençä, Mäskäwneñ ixlaslığına ışanuçı küp tügel.
"Bu utırış waqıtında Şura äğzalarınıñ kübese Rusiägä kisken tänqit belderde. – di İrakliy Alasania. – Çurkin kitergän dälillär ışandırırlıq tügel ide."
1990-nçı yıllarda Gruziädän bäysezleklären iğlan itkännän birle, Mäskäw Tsxinvali belän Suxuminı yaqlap kilde. Räsmi Tifllis Rusiäneñ bu soñğı ğamälen Gruziäneñ NATOğa kerü niätlärenä ayaq çalu dip bäyäli.
"Gruziä üze bu töbäktä tınıçlıq häm totrıqlılıqnı bozğan adımğa barmayaçaq. – dide atnakiç könne Gruziä prezidentı Mixail Saakaşvili. – Bügen bu töbäktä näq menä Rusiä köçläre häm ğamälläre qurqınıç tudıra."
Uzğan atna axırında Abxaziä kügendä Gruziäneñ pilotsız küzläw oçqıçı bärep töşerelde. Räsmi Tiflis anıñ Rusiäneñ MiG-29 xärbi oçqıçı tarafınnan bärep töşerelgänenä video häm radar dälilläre kiterde. Mäskäw moña qatışı buluın kire qaqtı häm Tiflisne provakatsiä oyıştıruda ğayepläde.
Estoniäneñ elekke premier-ministrı, zamanında Gruziä xökümäteneñ kiñäşçese bulğan Mart Laar süzlärençä, küptän tügel Buxarestta ütkän NATO sammitında Gruziägä Äğzalıq planınıñ älegä birelmäwen Mäskäw döres añlamağan. Ul anı Gruziä kire qağıldı, xäzer teläsäñ närsä eşläp bula, dip añlağan. Bu döres tügel di Laar.
Bu fiker belän amerikan prezidentlığına respublikan namzät McCain da kileşä. Saakaşvili belän dustanä mönäsäbätläre bulğan McCain, Rusiägä Gruziägä qarata telägänen eşlärgä yul quymasqa çaqırdı.