1 May bäyräme cir şarı buylap atlawın, ğädättägeçä, könçığıştan başladı. Fillipin başqalası Manilada qullarına şiğärlär totqan meñlägän keşe prezident Gloria Arroyo xökümätenä protest belderde.
Keşelär eş urınnarı taläp itte, azıq-tölek häm benzin bäyäläre artuğa protest belderde. Waqıt-waqıt eşlär qızuğa da kitkäläde. "Gloria xanım – açlıq krizisı!", "Korrupsiäne tuqtat!", "Sineñ säyäsäteñ xalıqqa qarşı!" dip qıçqırdı ber xanım.
Qayber protestçılar üzlärenä döge qapçıqları kigän ide. Soñğı aylarda dönya bazarında döge bäyäse ikelätä arttı. Könçığış xalıqları öçen bu töp azıq.
Progressiv xezmät berläşmäse digän oyışma citäkçese Josua Mata xättä açlıq başlanu qurqınıçı belän kisätä.
"Fillipinda açlar sanı arta, - di Mata. – Keşelär xökümätneñ buldıqsızlığına protest belderä. Xökümätneñ bu mäsäläne çişä almawın kürep yöräk ärni."
İndoneziä başqalası Jakartada şul uq taläplär. Hönär berlekläre oyıştırğan çarada 15 meñläp keşe qatnaştı. Prezident sarayına citkäç, politsiä xalıqnı su atıp tuqtattı.
Törkiä xökümäte 1 May yöreşenä röxsät birmäde. Alay da İstanbulda meñlägän student häm eşçe üzäk mäydanğa ütergä tırıştı. Politsiä alarnı quıp taratu öçen yäş gazı qullandı. 200-läp keşe totqarlanğan, 6 politsiä xezmätkäre yaralanğan.
Rusiädä 1 may çaraları tınıç ütte. Läkin, anda da keşelär yäşäw şartlarına, bäyälär üsügä protest belderde. Räsmi sannarğa qarağanda bu yılda ğına bäyälär 6%-qa artqan.
Çiläbedä "Xezmät xaqları bäyälärdän tizräk artsın!" digän şiğär belän ütkän çarada 14 meñläp keşe qatnaşqan. Bu taläp Mäskäwdä ütkän mitingta da qaytawaz bulıp yañğıradı.
"Dönya däräcäsenä kütärelgän bäyälärgä tiñ xezmät xaqları kiräk, - di Rusiäneñ hönär berlekläre federatsiäse prezidentı Mixail Şmakov. – Älbättä, moña ber säğattä ireşep bulmıy, läkin äwzemräk xäräkät xäzer başlanırğa tieş."
Qulına qızıl qanäferlär totqan kommunistlar citäkçese Gennadiy Zyuganov ber törkem yäşlärgä aldında alar belän fikerdäş buluın añlatırğa tırıştı.
"Yäşlär problemnarnı yaxşıraq sizä, köçle ildä yäşärgä teli, - di Zyuganov. - Yaxşı eş, yaxşı xezmät xaqları, çın ğailä bulır dip ömetlänä."
Läkin Mäskäwdä xalıqnıñ küpçelegen bügen komunistlar tügel, başqa partiä cıydı. "Berdäm Rusiä" ütkärgän çarada 20 meñläp keşe qatnaşqan.