Google Nexus 7 планшетын күрсәтте

Узган төндә Сан-Францискода Google ширкәте Nexus 7 дип аталган яңа “тактасын” (планшетын) тәкъдим итте. Ун көн элек кенә Microsoft Surface тактасын күрсәткән иде. Планшетлар базарында кызу көрәш башлана.

Nexus 7 җиһазы Android 4.1 Jelly Bean исемле яңа операцион систем нигезендә эшләячәк. Бу яңа систем да узган төндә бәян ителде.

Планшетның ал ягына 1.2 мегапикселлы камера куелган. Bluetooth, Wi-Fi, NFC әсбаплары бар. Хәтер күләме – 8GB йә 16GB. Экран зурлыгы – 7 дюйм (1280x800 нокта). Гомум зурлыгы – 199x120x10 мм. Авырлыгы – 340 грамм. Бу яңа җиһазны Asus ширкәте ясаячак.

Яңа җиһазда Google ширкәтенең Chrome гизгече (browser), моннан тыш, Google Play, YouTube һәм хариталары алдан куелган булачак.

Nexus 7 планшетының бәясе – $199 (8GB) йә $250 (16GB).

Google вәкилләре әйтүенчә, бу җиһаз Google-Play кибетеннән әйберләр сатып алу өчен уңайлы булачак – програмнар гына түгел, китап, музыка, видеолар.

Һәр сатып алучыга Google-Play кибетендә куллану өчен $25 биреләчәк.

Nexus 7 планшетын сатулар июль уртасында башланыр дип көтелә.