Кырым низагы. Вакыйгалар дисбесе

КИЕВ БМОГА МӨРӘҖӘГАТЬ ИТӘ -- Украинаның яңа җитәкчелеге БМО Иминлек шурасын Кырымдагы вазгыятьне карау өчен җыелырга чакыра. 28 февральдә Украина Югары радасы шундый карар чыгарды. Парламент рәисе, президент вазифаларын башкаручы Александр Турчинов БМО Иминлек шурасын Кырымдагы вәзгыятьне күзәтү генә түгел, Украина суверенлыгы бозылган очракта, чаралар да күрергә өндәде. Узган төндә Акмәчет һәм Акъярдагы һава аланнарын кораллы кешеләр басып алды. Аларның Русия хәрбиләре булуы турында хәбәр ителде.

"КЫРЫМНЫ БАСЫП АЛУ" -- Җомга иртәсендә Кырымның Акъяр (Севастополь) һәм Акмәчет (Симферополь) һава аланнарын билгесез кораллы кешеләр камап алды. Аларның кемнәр һәм кайдан булулары турында каршылыклы хәбәрләр килә. Украина эчке эшләр министры Арсен Аваков Кырымдагы хәлләрне Русия тарафыннан кораллы бәреп керү һәм басып алу дип атады.

КЫРЫМДА ПРЕЗИДЕНТ ВӘКИЛЕ -- Украина президенты вазифаларын башкаручы Александр Турчинов Виталий Кличконың “Удар” фиркәсе әгъзасы, Украина Югары радасы депутаты Сергей Куницынны президентның Кырымдагы даими вәкиле итеп билгеләде. Элек Куницын 6 ел Кырым хөкүмәтен, 4 ел Акъяр шәһәрен җитәкләде. Киевтагы “5 канал”га ул “кырымтатарлар Кырым Югары радасы алдына чыгып Украина дәүләтчелеген яклады” диде. Кырым һава аланнарындагы урыс оешмалары вәкилләре Куницынны Кырымга кертмәячәкләрен белдерде.

ЯҢА ПРЕМЬЕР БИЛГЕЛӘНДЕ -- Кырымның 100 урынлы Югары радасы 52 тавыш белән "Урыс берлеге" оешмасы рәисе Сергей Аксеновны Кырымның яңа премьер-министры итеп билгеләде. Бу карар парламент янына җыелган Русия яклы демонстрациячеләр алдында игълан ителде. Аксенов Мәскәү ярдәменә өметләнүен һәм Русиядән акча көтүен белдерде.

РЕФЕРЕНДУМ ҮТКӘРҮ КАРАРЫ -- Кырым югары радасы Кырым хөкүмәтен тарату һәм 25 майда, Украина президент сайлавы белән бер көндә Кырым статусы турында референдум үткәрергә дип карар итте. 100 урынлы радада бу тәкъдимнәрне 60-лап депутат хуплаган. Утырыш раданы бүген иртән кораллар белән басып алган билгесез кешеләр күзәтүе астында узды.

БАЛТЫЙК ФЛОТЫ КАРА ДИҢГЕЗДӘ -- Русия Балтыйк хәрби диңгез фролытының десантлар йөртүче "Калининград" һәм "Минск" исемле ике зур корабы Босфор бугазы аша Кара диңгезгә кергән.

РАДАНЫҢ ЧИРАТТАН ТЫШ УТЫРЫШЫ -- Бүген Кырым Югары Радасы чираттан тыш утырышын үткәрәчәк. Бинаны узган төндә басып алган кораллы кешеләр депутатларны бинага үткәрәләр. Көн тәртибендә бер мәсьәлә -- Кырым автономиясенең вәкаләтләрен киңәйтү. 26 февральдә чираттан тыш утырышны үткәрергә кырымтатарлар мөмкинлек бирмәгән иде. Украина иминлек хезмәте бүген кырымтатарларны бу биналар янына бармаска чакырды.

РАЗИЛ ВӘЛИЕВ БЕЛДЕРҮЕ -- Татарстан Дәүләт шурасының Мәгариф, мәдәният һәм милли мәсьәләләр комитеты рәисе Разил Вәлиев: "Без Кырымга вәзгыятьне җентекләп өйрәнергә килдек", дип белдерде. Аның сүзләренчә, медиа аша таратылган мәгълүмат бертөрле, әмма урынга барып аралашу хакыйкатьне ача".