Кырым низагы. Вакыйгалар дисбесе

"БЕРКУТ" ХЕЗМӘТКӘРЛӘРЕНӘ МӘСКӘҮДӘ ЭШ ТӘКЪДИМ ИТЕЛӘ -- Киевтагы Евромайданда дистәләрчә демонстрациячене үтерүдә гаепләнүче, Виктор Янукович хакимияте җимерелгәннән соң Кырымга качкан "Беркут" хезмәткәрләре киләчәктә Мәскәү урамнарында да тәртип саклау өчен чыгарылырга мөмкин. Шимбә көнне Акмәчеттәге Русия баш консуллыгы "Беркут"та хезмәт иткән 9 кешегә Русия паспорты тапшырды. Русия эчке эшләр министрлыгының Мәскәү идарәсе Русия ватандашлыгы алган һәм Русия эчке эшләр министрлыгында эшләргә теләүче элекке беркутчылардан махсус бүлек оештырырга әзер булуын белдерде.

АКШ РУСИЯНЕ УКРАИНАГА БАСЫП КЕРҮЕН ТУКТАТЫРГА ЧАКЫРА -- БМО иминлек шурасының гадәттән тыш утырышында Кушма Штатлар Русиянең Украинага басып керүен туктатырга чакырды. АКШның БМОдагы илчесе Саманта Пауэр утырышта чыгыш ясап Русияне халыкара йөкләмәләрне бозуда гаепләде. "Русиягә Украинадагы интервенцияне ткутатырга вакыт. Русия гаскәрләре аннан китәргә тиеш" диде ул. Ул шулай ук Украинага кичекмәстән БМО һәм ЕИХО күзәтүчеләрен җибәрергә чакырды.

УКРАИНА ГАСКӘРЕН ӘЗЕРЛӘДЕ--
Украин армиясе тулы хәрби әзерлек хәленә китерелде. Мондый карарны 1 март кичендә Украинаның милли иминлек һәм саклану шурасы кабул иткән. Президент вазифаларын башкаручы Александр Турчинов сүзләренчә, бу "потенциаль агрессия" сәбәбе аркасында эшләнелгән.

ОБАМА ПУТИННЫ КИСӘТТЕ -- АКШ президенты Барак Обама Русия президенты Владимир Путинны Русия гаскәрләрен Кырымдагы ныгытмаларына кайтарырга чакырды. Шимбә көнне Путин белән телефон аша сөйләшеп Обама, Мәскәүнең халыкара кануннарны бозуын дәвам итүе "аның сәяси һәм икътисади изоляциясен" көчәйтәчәк, дип кисәтте./AP, AFP, Reuters/

ЗЕМФИРА УКРАИНАГА ТЕЛӘКТӘШЛЕК БЕЛДЕРДЕ--
Танылган җырчы Земфира (Земфира Рамазанова) үзенең сайтыннан барлык мәгълүматны бетереп, кара фон өстендә бары тик бер материал калдырган - Украин телендә башкарылган җырының видеоязмасын. “Океан Эльзы” төркеменең “Отпусти” дип аталган әлеге җырын ул 2008 елда ук украин музыкантларына теләктәшлек белдереп җырлаган иде.

Җырчының сайтына әлеге үзгәреш 1 мартта кич, Русия президенты Владимир Путин Украинада гаскәр куллану үтенече белән Федерация шурасына мөрәҗәгать иткәч кертелде.

УКРАИНАДА МОБИЛИЗАЦИЯ ИГЪЛАН ИТЕЛДЕ -- Украинаның Милли иминлек һәм саклану шурасы секретаре Андрий Парубий Русиянең басып керү куркынычы сәбәпле илдә гомум мобилизация игълан ителү турында белдерде. Саклану министрлыгына бар ил буйлап резервистлар тупларга күрсәтмә бирелгән. Белдерүдә әйтелгәнчә, бу чара "Украинаның иминлеген һәм бөтенлеген саклау" өчен күрелә. /AR, Reuters/

ТАТАРСТАН ДЕПУТАТЛАРЫ КОНСТАНТИНОВ БЕЛӘН ОЧРАШТЫ -- Кырымда сәфәрдә булган Татарстан депутатлары Кырым Югары Радасы рәисе Константинов белән очрашкан. Разил Валиев Азатлыкка әйтүенчә, алар аңа "әгәр кырымтатарларның мәнфәгатьләре, таләпләре искә алынмаса, бу Кырымда зур проблемаларга юл ачачак" дип кисәткән.

КЫРЫМТАТАРЛАР РУСИЯГӘ КУШЫЛЫРГА ТЕЛӘМИ -- Кырымда төрле тарафлар белән очрашуларда булып кайткан Татарстан вәкилләре Казанда матбугат очрашуы үткәрде. Татарстан Югары шурасының Мәгариф, мәдәният, милли мәсьәләләр комитеты рәисе Разил Вәлиев кырымтатарларның нигә Украинада калырга теләвен аңлатты. Аның әйтүенчә, кырымтатарлар Русиядә түгел, ә Европа хокукый киңлекләренә керергә теләүче Украинада үз хокукларының сакланачагын әйткән.