МИҢНЕХАНОВ КЫРЫМ МИНИСТРЛАР ШУРАСЫНДА --
5 мартта Татарстан президенты Рөстәм Миңнеханов Акмәчеткә килде. Хәзер ул Кырым министрлар шурасы вәкилләре белән очраша.

ATR КАНАЛЫ ТНВ БЕЛӘН ХЕЗМӘТТӘШЛЕК ТУРЫНДА ӘЛЕГӘ БЕЛМИ--

ATR белән "Яңа Гасыр" каналлары арасында хезмәттәшлек турында сөйләшүләр булачагын Кырым каналының баш җитәкчесе Эльзара Ислямова әлегә белми. Татарстан президентының "хезмәттәшлек турында уйланабыз" дигән сүзләренә карата ул Азатлык радиосына "Әминов әфәндене үзебездә көтәбез, ТНВ белән хезмәттәшлеккә бик уңай карыйбыз" диде. Татарстан президенты белән бергә килүчеләр арасында "Яңа Гасыр" ширкәте җитәкчесе Илшат Әминов та бар.

ЧЕЛТӘР БӘХӘСЛӘРЕ--

Социаль челтәрләрдә актив рәвештә Миңнехановның Кырымга килүе турында фикер алышалар.

“Путин Кырымга һаман үз илчеләрен җибәрә дә җибәрә. Аларның төп максаты: мәҗлесне “сатып алу”, ләкин әлегә бу берничек тә барып чыкмый. Кырым татарлары Кырым халкының 15 процентын гына тәшкил итсә дә, сәяси яктан алар 50 процент тәэсир көченә ияләр. Алар белән килештермичә Кырымны яулап булмый”, - дип яза Кырымнан Ahmad AbuMahmyd исемле кулланучы.

Миңнехановның Кырымга баруы турында үз фикерен НОРМ (Рус мөселманнары милли оешмасы) җитәкчесе Харун Сидоров та өсти:

“Соңыннан аның республикасын бетергәч, урынына Мәскәүдән губернатор җибәргәч үкенмәсен”, - ди ул.

Albert Qırımlı исемле кулланучы яза:
“Гадәти хәл. Мөслим илләре белән элемтә корасы булганда да Татарстан җибәрелә. Төрле төрки илләре белән дә шулай ук Татарстан җибәрелә. Мәҗбүри булу күренә ич”.

МИҢНЕХАНОВ АКМӘЧЕТТӘ ҖӘМИГЪ МӘЧЕТЕНДӘ БУЛДЫ--

Татарстан президенты Рөстәм Миңнеханов Кырымга сәфәре барышында Акмәчеттә җәмигъ мәчетендә булган. Анда ул Кырым мөфтие Әмирали Аблаев белән очрашкан.

Күптән түгел Татарстан инвесторлары Акмәчеттә төзеләчәк җәмигъ мәчетен финанслауны үз өсләренә алачагы әйтелгән иде.

Билгеле булганча, чәршәмбе көнне Татарстан һәм Кырым арасында хезмәттәшлек килешүе имзаланды. Татарстан ягыннан аны премьер-министрның беренче урынбасары Алексей Песошин, ә Кырымнан министрлар шурасы рәисе урынбасары Рөстәм Тимергалиев имзалады.

КАЗАН ДЕПУТАТЫ "БЕРКУТ"НЫ ЭШКӘ ЧАКЫРГАН--

Казанда Кырым хөкүмәтен яклап узган митингта Казан дәүләт шурасы депутыт Илдус Янышев «Беркут» хезмәткәрләрен эшкә чакырган. Ул үзенең «Дельта» хосуси саклау ширкәте башлыгын булуын һәм «Беркутларны» мактап эшкә урнаштырырга әзер булуын әйткән.

МИҢНЕХАНОВ ҺӘМ ЧУБАРОВНЫҢ ОЧРАШУЫ (ВИДЕО)--

Президент Рөстәм Миңнеханов җитәкчелегендәге Татарстан делегациясенең Кырым татарлары белән очрашуының видеосы пәйда булды.

КАЗАНДАГЫ КЫРЫМ МИТИНГЫНА МӘҖБҮРИЛӘП ЧЫГАРГАННАР
Бүген Казанның Меңъеллык мәйданында Кырымга теләктәшлек белдерү митингы узды. Анда катнашучылар инстаграмда язганча, берәүләрне анда мәҗбүриләп чыгарганнар, башкаларны чарага барыр өчен дәресләрдән азат иткәннәр.

ЯВЛИНСКИЙ УКРАИНАГА ГАСКӘР КЕРТҮ МӘСЬӘЛӘСЕНДӘ ПЕТЕРБУР ДЕПУТАТЛАРЫН ТӘНКЫЙТЬЛИ (ВИДЕО)
"Яблоко" фракциясе җитәкчесе Григорий Явлинский Петербур канун чыгару шурасын Украина вазгыятенә карата мөрәҗәгате өчен тәнкыйтьли.