Кырым низагы. Вакыйгалар дисбесе

РУСИЯ ДУМАСЫ КЫРЫМ ПАРЛАМЕНТЫНЫҢ РЕФЕРЕНДУМ КАРАРЫН ХУПЛАДЫ--

Русия дәүләт думасының дүрт фракциясе дә Кырым хакимиятенең автономия статусы турында референдум уздыру карарын хуплап чыкты.

КИЕВ ЯНУКОВИЧНЫ ИНТЕРПОЛГА ЭЗЛӘҮГӘ БИРДЕ--

Интерпол Украинаның яңа хакимиятеннән Виктор Януковичны кулга алырга кирәкле кешеләр исемлегенә кертү таләбен алды. Бу хакта оешманың матбугат хезмәте хәбәр итә.

КЫРЫМДА ЖУРНАЛИСТЛАРГА ЧИРАТТАГЫ ҺӨҖҮМ (ВИДЕО)

Акмәчеттә битлек кигән билгесез кешеләр чит ил журналистларының матбугат үзәгенә һөҗүм итте. Кораллы һөҗүмчеләр APTN агентлыгының техник җиһазларын алып чыгып киткән.

Чыкканда моны видеога төшереп торган Болгарстан журналистына һөҗүм итеп, аның башына пистолет терәп, камерасын талап алганнар.

РБК агентлыгы Кырым референдумының бюллетенен күрсәтә

ЧУБАРОВ ҺӘМ АБЛАЕВ МӘЧЕТТӘН МӨРӘҖӘГАТЬ ИТТЕ

Кырымтатар мәҗлесе рәисе Рифат Чубаров һәм мөфти Әмирали Аблаев җомгада Акмәчеттәге баш мәчеттән кырымтатар халкына мөрәҗәгать итеп, "урамнарда дошманнар, чит ил хәрбиләре йөргәндә" бердәмлекне сакларга, ил бөтенлеген саклар өчен барысын да эшләргә тырышырга чакырды.

RUSSIA TODAY КЫРЫМНЫ РУСИЯГӘ "КУШКАН"

Мәскәү Кремленең RT (Russia Today) каналы Русия харитасын күрсәткәндә Кырым ярымутравын аңа кушып (бер төстә) күрсәтте.

ТУРЧИНОВ КЫРЫМ РЕФЕРЕНДУМЫН ТУКТАТУ ТУРЫНДА КАРАР ЧЫГАРДЫ

Украина президенты вазифасын башкаручы Александр Турчинов Кырым референдумын туктату турында карар чыгарды. Карар бүген президент вазифасын башкаручының сәхифәсендә дөнья күрде.

"ПУТИННЫҢ КЫРЫМДАГЫ РУС ХӘРБИЛӘРЕ ТУРЫНДА ЯЛГАНЫ" (ВИДЕО)--

Борис Немцов тәкъдим итә: "Путинның Кырымдагы рус хәрбиләре турында ялганы". Парнас партиясе һәм "Солидарность" хәрәкәте видеосы.