Сөргенгә 70 ел. Матәм чаралары

Сөргеннең 70 еллыгы уңаеннан матәм чаралары 10 май Чатыр-дагка күтәрелүдән башланды. Кырымтатар мәҗлесе, Милли көрәш федерациясе һәм яшьләр оешмалары оештырган чарада ике меңләп кеше катнашты.

15 май Русия полициясе Мәҗлеснең тышкы эшләр бүлеге җитәкчесе Али Хәмзиннең Бакчасарайдагы йортында тентү башлады.

18 май үтәчәк Матәм җыены алдыннан полициянең Акмәчеткә дистәләрчә автозак китерүе хәбәр ителә.

Сталин кушуы белән 1944 елның 18 маенда Кырымнан тулысынча сөрелгән кырымтатар халкының бер улы Али Алиев Азатлыкка үзе күргәннәрне сөйләде. [ВИДЕО]

Бүген Акмәчетнең "Кырымтатар сәнгать музеенда" кырымтатарлары депортациясенең 70 еллыгына багышланган күргәзмә эшли башлады. НКВД мәгълүматларына күрә, 1944 елның 17-18 май көннәрендә Кырымнан 191014 кырымтатары куыла, шушы кешеләрнең 46 проценты депортациянең беренче елында вафат була.​

Кырымтатар мәҗлесеның тышкы бәйләнешләр бүлеген җитәкләүче Али Хәмзин Азатлыкка интервьюда 15 майда үз өендә, бер көн алдарак кырымтатар җитәкчесе Мостафа Җәмилев һәм башка активистлар өйләрендә булган тентүләрнең максаты – Кырымтатар мәҗлесен юк итү булырга мөмкин дип исәпләвен белдерде. [ВИДЕО]

Кырымтатарлар сөргенгә җибәрелүнең 70 еллыгын 18 майда Кырым башкаласы Акмәчеттә зур матәм чарасы белән искә алырга җыенганда шәһәр урамнарына ОМОН көчләренең күпләп китерелүе күзәтелә. Полиция көчләре Акмәчетнең үзәк мәйданында һәм аның янындагы урамнарда туплана. Полиция машиналарыннан тыш шәһәргә БТРлар да китерелгән. [ВИДЕО]

Бакчасарайдагы "Ларишес" музеенда кырымтатар сөргененең 70 еллыгына багышланган күргәзмә ачылды. Анда Кырымда яшәүче рәссам Виктор Сорокинның "Хәтер елавы" исемле рәсемнәр тәлгәше тәкъдим ителә. [ВИДЕО]

Кырымтатарлар сөргененең 70 еллыгы алдыннан Кырымның үзешчән хакимияте күп кеше катнашкан бөтен чараларның тыелачагын белдерде. Мәҗлес рәисе урынбасары Нариман Җәлял Азатлыкка белдерүенчә, бүген төштән соң Мәҗлес чираттан тыш утырыш үткәрә.