Казанда кунакханә бәяләре 14%ка артты
Ноябрь аенда Казанда кунакханә бәяләре 14 процентка арткан. Уртача 4325 сум тәшкил итә дип хәбәр итә trivago.ru. Русиядә ноябрьдә уртача бәяләр октябрь ае белән чагыштырганда 2 процентка күтәрелгән.
Реаль хезмәт хаклары төшәчәк
Русия икътисади үсеш министрлыкның соңгы фаразларына караганда, 2015 елда ил халкының реаль кулланырлык керемнәре 2,8 процентка, реаль хезмәт хакы 3,9 процентка кимер дип көтелә.
Русиядә авиабилетлар 15%ка артты
Русиядә доллар үсү сәбәпле халыкара рейсларга билет бәяләре 15%ка артты. Pososhok билетлар сату агентлыгы генераль директоры Кирилл Фаминский рубль тотрыксыз булганга билетка бәя үсү туктауга шик белдерә. Аның сүзләренчә, 3 декабрьдәге бәя үсүгә кадәр билет алучылар 30%ка кимегән булган һәм бу хәл алга таба да дәвам итәчәк.
Татарстанда узган атнада 758 кеше эшсез калган
Бу хакта Татарстан хезмәт, халыкны эш белән тәэмин итү һәм социаль яклау министрлыгы матбугат хезмәте белдерә. Узган атнада исә Татарстан мәшгульлек үзәгендә 720 кеше теркәлгән булган. Хәзер Татарстанда бу үзәктә теркәлгән 14700 эшсез бар дип белдерелә.
Marks&Spencer Казаннан китә
Британиянең дөньяда танылган челтәре Marks&Spencer үзенең Казандагы кибетен яба. "Южный" сәүдә үзәгендә эшләгән кибет 2011 елда ачылган иде.
"Камаз" майга кадәр 4 көнлек эш атнасында
"Камаз" машиналар җитештерү ширкәте 2015 елның май аена кадәр атнага дүрт көн генә эшләячәк. Хезмәт хаклары да бары тик эшкә чыккан көннәр өчен генә түләнәчәк. Бу хакта Чаллының мәшгульлек үзәге белдерә. Элегрәк дүрт көнлек эш атнасы 24 ноябрдән 2014 ел ахырына кадәр булачак дип хәбәр ителгән иде.
Халык рубльләрдән котылырга ашыга
"Ашан. Кичке 5. Ярма-макарон-тозлы киштәләр буп-буш. Кемгә эләкмәгән, шулар эзләнәләр, мәш киләләр, сатучылардан сорыйлар. Ачлык игълан ителмәгәндер бит?
Автосалоннарда (бу көннәрдә машина эзләдек) ЧИРАТ, күз алдыгызга китерәсезме? Консультант килеп сиңа игътибар бирсен өчен чират көтәсе. Минимум 20 минут. Бронь шунда ук, кеше ике уйлап тормый. Сатучылар күпертә - менә иртәгәдән арта, менә точно 5сеннән арта, точно 10сыннан арта. Кешеләрнең күзендә ужас. Чират көткәндә аңлаганым - күбесе машина аласы да булмаганнар, әмма җыеп куйган 500-1000 мең акчалары булган, аңа машинадан башка берни алып булмый, хет машина булса да алыйк диләр.
Икеа. Этеш-төртеш. Ниндидер ненормальный ажиотаж. Рәттән себерәләр. Карап торсаң - кешегә ул кирәк тә түгел, ләкин акчаны тотып бетерәсе бар. Һәрхәлдә тынычлап товар сайлаучы күрмәдем мин анда. Күз-башлары акайган сатып алучылар гына күрдем.
Базар. Яңа ел алды движухасы. Киштәләрдән әйбер сыдыру. Бер "Крымнаш" кыяфәтле апа сыек май алганда кычкырып ук җибәрде - почему все дорожает???"
Алсу Исмәгыйлева
Казан
Русиядә ипи бәясе 10%ка артачак
Ипи пешерүчеләр он, бодай, шикәр, чит илдән кергән чималга бәя артканга һәм транспорт чыгымнары үскәнгә ипигә дә бәя күтәрелә дип белдерә. Бу хакта "Коммерсантъ" яза. Татарстанда ипи бәяләре 1 декабрьдә үк арта башлаган. Теләче районындагы кайбер кибетләрдә "Сельский" дип аталган кара ипине 25 сумга күтәргәннәр, декабрьгә кадәр ул 23 сум булган.
Ноябрь ахырында токмач 20-25%ка күтәрелә дип белдерелде. Русиядә халык карабодайга бәянең нык артуына зарлана. Кайбер кибетләрдә аны 70 сумнан да кыйммәткәрәк саталар.