Элекке Югославия илләреннән Хорватия һәм Сербия ватерпол ир-ат җыелма такымнарын язмыш Казанда Дөнья су спорты чемпионатының финалында очраштырды. Күп кенә җанатар бу очрашу бик киеренке булыр дип көтсә дә, Сербия уен башыннан көндәше капкасына бер-бер артлы туплар кертеп үзенең көчлерәк булуын күрсәтте.
Сербия җанатарлары да үз тавышлары белән ярдәм итте булса кирәк, соңгы чиректә Сербия хәтта дүрт туп кертеп көндәшенә бер туп кертергә дә ирек бирмәде. Нәтиҗәдә Сербия җыелмасы Хорватия җыелмасын 11-4 исәбе белән җиңеп чемпионатта бердәнбер медален алды.
Чемпионатта өченче урын өчен барган көрәштә Греция җыелмасы Италия җыелмасын пенальтида 4-2 исәбе белән җиңеп бронза медальгә ия булды.
Русиянең ир-атлар ватерпол җыелмасы Казанда үткән Дөнья чемпионатында бик уңышсыз чыгыш ясады һәм 14нче урын белән генә кәнәгатьләнде.
