Париж саммитында Путин Эрдоган белән аерым очрашмаячак
Русия президенты Владимир Путин климат үзгәрешләре турында Парижда узучы саммитта Төркия президенты Рәҗәп Таййип Эрдоган белән очрашмаячак. Путин сүзчесе Дмитрий Песков президентның Эрдоган белән әлегә очрашырга да, телефон аша сөйләшергә дә җыенмавын белдерде. Элегрәк мондый очрашу булу мөмкинлеге турында Төркия президентына якын чыганакка таянып Reuters агентлыгы хәбәр иткән иде. Эрдоган үзе дә France24 телевидениесенә интервьюда шундый тәкъдим ясаган иде.
Төркиягә каршы чикләүләр беренче чиратта азык-төлеккә карый
Русия хөкүмәтендә Төркия тауарларына каршы әзерләнгән чикләүләр үз эченә беренче чиратта җиләк-җимеш һәм яшелчәләрне ала. Азык-төлек булмаган тауарлар әлегә чикләнми. Бу турыда беренче вице-премьер Игорь Шувалов белдерде.
Вице-премьер Аркадий Дворкович сәнәгать тауарлары өчен дә чикләү исемлеге әзерләнә, әмма әлегә алар чикләнмәячәк, диде. Дворкович әйтүенчә, Төркиядән Русиягә кертү тыелган тауарларның тулы исемлеген тиздән игълан итәргә җыеналар һәм ул чикләүләр берничә атнадан гамәлгә керәчәк.
Анкара Русиягә каршы чикләүләр кертмәячәк
Төркия премьер-министры Әхмәт Давутоглу Анкара Русия ватандашларына каршы чикләүләр кертмәячәк дип белдерде. Брюссельдә НАТО генераль секретаре Йенс Столтенберг белән очрашудан соң Давутоглу журналистларга: "Без Русия халкына начар тәэсир итәчәк гамәлләр кылмаячакбыз. Русия халкы безнең халык өчен дус. Анталия күп кенә русиялеләрнең икенче йортына әверелде, без Русия туристларын көтеп калабыз", диде. Ул шулай ук Русиянең Төркиягә каршы керткән чикләүләре Русиянең үзенә дә зыян китерәчәге турында кисәтте.
Икътисадчылар Төркиягә чикләүләрнең Русиядә инфляцияне көчәйтәчәген әйтә
Мәскәүнең Төркиягә каршы чикләүләре Русиядә инфляцияне өстәмә ике процентка арттырырга мөмкин. Альфа-Банкның баш икътисадчысы Наталия Орлова белән өлкән аналитигы Дмитрий Долгин моны сезонлы азык-төлек импортында Төркиянең өлеше аеруча зур булу белән аңлата. Русиянең гомуми импортында Төркиянең өлеше 2 процент чамасы гына булса да, яшелчә һәм җиләк җимеш импортында Төркия өлеше 20 процентка, ә помидор һәм йөзем импортында 41 процентка җитә диелә. Икътисадчылар кисәтүенчә, кышын Русиядәге җитештерүчеләрнең мөмкинлекләре аз булганда андый чикләүләр кертүнең инфляциягә тәэсире аеруча көчле булачак. Банк аналитиклары Төркия һәм Мисырга туризм бетерелгәннән соң Русия эчендәге туризм бәяләренең дә артачагын белдерә.
Русия тыелган төрек азык-төлеге исемлеген чыгарды
Русия хөкүмәте 2016 елның 1 гыйнварыннан Төркиядән импортлау тыелган азык-төлек исемлеген игълан итте. Тыелган яшелчәләр исемлегенә помидор, кыяр, башлы суган, чәчәк кәбестә, брокколи кергән. Тыелган җиләк-җимеш исемлегенә киптерелмәгән һәм киптерелгән цитрус җимешләре, киптерелмәгән алма, груша, өрек, шафталы(персик), прунус(слива), кара өрек(терн), йөзем, җир җиләге керә. Шул ук вакытта лимон импорты тыелмый. Русиядәге лимон импортында Төркиянең өлеше 90 процентка җитә.
Тавык һәм күркә итенең кайбер төрләре һәм алардан җитештерелгән ризыклар да тыела. Мөгезле эре терлек, сөт һәм сөт ризыклары, балык импорты тыелмый.
Бу тыелган азык-төлек төрләрен Төркиядән кайтучыларга алып кайту рөхсәт ителәчәк, әмма чикләнгән күләмдә, шәхси куллану өчен генә.
"Төркия агымы" проекты туңдырылырга мөмкин
Русия президенты Владимир Путинның Төркиягә карата "махсус икътисади чаралар" куллану турындагы фәрманы нигезендә "Төркия агымы" газүткәргече төзелеше туңдырылырга мөмкин. Бу турыда Газпромдагы чыганакларына таянып Reuters агентлыгы хәбәр итә. Ширкәтнең бер вәкиле үз исемен атамау шарты белән агентлыкка "Без дәүләт башлыгы "Төркия агымын" туңдыруны игълан итәр дип көтәбез, яки кимендә ниндидер кичектерү игълан ителер дип көтелә", дип белдергән. Европа берлеге 2007 елда планлаштырылган "Көньяк агым" проекты Европа энергетика кануннарына туры килми дип былтыр аны кире каккач, 2014 елның 1 декабрендә Русия президенты Владимир Путин Анкара сәфәре вакытында "Төркия агымы" турында килешүгә ирешелде һәм ул 2016 елның декабрендә Русия газын Төркиягә кудыра башларга тиеш иде.
Русия хөкүмәте азык-төлек кытлыгы чыгуны кире какмый
Мәскәү карары белән Төркиядән кайбер төр азык-төлек кертүне тыю Русиядә җиләк-җимеш һәм яшелчә кытлыгына китерергә мөмкин. Бу турыда белдергән икътисади үсеш министры Алексей Улюкаев моны башка илләрдәге җитештерүчеләр белән килешүләр төзү һәм фитосанитар тикшерү мәсьәләрен хәл итү өчен беркадәр вакыт кирәк булачагы белән аңлатты. "Моңа вакыт кирәк булачак, шуңа күрә ниндидер кыска вакытлы тоткарлыклар булу мөмкинлеген кире кагып булмый", диде Улюкаев "Россия 24" телевидениесенә. Русиянең җиләк-җимеш һәм яшелчә импортында Төркиянең цитрус җимешләре, помидорлары аеруча зур өлеш алып тора. Русия чикләүләре илдә инфляция артуга да шактый өлеш кертәчәк дип фаразлана.
Эрдоган Русия чикләүләренә җавап чаралары белән яный
Төркия президенты Рәҗәп Таййип Эрдоган, Русия Су-24 очкычын бәреп төшергән өчен аңа "тиңдәш булмаган" чикләүләр сәясәтен үзгәртмәсә, Анкараның җавап чаралары куллануы белән янады. "Без хисләргә бирелмәдек һәм алга таба да бирелмәячәкбез. Без бу киеренкелекне кискенләштерергә теләмибез. Без дипломатик ысуллар белән эш итәчәкбез. Әгәр Русия болай кылана икән, җавап буларак без үз чараларыбызны куллана башлаячакбыз. Без Русиянең тиңдәш булмаган реакциясен кызганыч белән күзәтәбез", диде Төркия президенты.