Форумда катнашучыларның очрашу-танышу чарасыннан фотогалерея
Татар яшьләре форумында катнашучыларның очрашу-танышу чарасы
Татар яшьләре форумына килеп теркәлү узганнар Милли-мәдәни үзәкнең Казансу елгасына караган ягында очрашу-танышу чарасына җыелды. Бу чараны Татар форум җитәкчесе Тәбриз Яруллин һәм урынбасары Айрат Фәйзрахманов алып барды. "Эшлекле уен" дип аталган бу чарадан Азатлык фотогалереясен карагыз.
"Татар тауары сыйфатлы булсын!"
Хәзерге вакытта Универсиада авылында "Дөньякүләм татар кафесы" чарасы бара. Яшьләр ничек акча эшләргә кирәк дип баш вата. Халыкка файдалы эш булганда үзеңә дә бәрәкәт арта, диләр. Яшьләр эшмәкәрлек белән шөгыльләнергә, социаль проектларын булдыру мөһим, дип фикер алыша. Мисал итеп "Түбәтәй" милли ашлар челтәрен, Halal guide проектын китерделәр. Яшь эшмәкәрләр делегатларга эшлисез икән, татар тауарын сыйфатлы итеп ясарга тырышыгыз, дип киңәш бирде.
Кичке аш
Кичке аш Универсиада авылында оештырылды, 900ләп кеше өч озын чиратка тезелеп басты. Пешекчеләр өлгерми. Ризык өләшүче хатыннар: "Компот алучыларга - чәй юк" дип торды. Татарларда дилемма - компотын да эчәсе килә, чөнки эссе, әмма чәйсез дә тамак туймый.
Күбеседә талон кайгысы, кәгазь булмаса ярты сәгать көткән кешене борып җибәрәләр. Ризыкны хәләл, диләр. Вегетариан ризыкларын да хәстәрләгәннәр. Анда чират юк, пешекче бары тик биш кешене ризыкландырдык, диде Азатлыкка.
Солтан Сафин: "Эшмәкәрлек татарларны берләштерә"
Форумның беренче көнендә катнашучылар белән очрашкан "Түбәтәй" туклану челтәре җитәкчесе Солтан Сафин эшмәкәрлекнең татар җәмәгатьчелегенә тәэсирен аңлатты. Сафин, "Түбәтәй" челтәренең максаты - милли татар ризыгын дөнья базарына алып чыгу һәм татарларны берләштерү диде.
Яшьләр форумында яңа формат – "Бөтендөнья татар кафесы"
4 июль кичендә Казанның Универсиада авылында форумда катнашучыларның оешма-проектлары “Бөтендөнья татар кафесы” чарасында тәкъдим ителде. Ике сәгатьләп Русия, Үзбәкстан, Чехия, Төркия, Германия кебек илләрнең вәкилләре үз оешмалары турында сөйләп идеяләрен бүлеште.
Форумчылар беренче көнне альтернатив татар музыкасы белән тәмамлады
Татар яшьләре форумы егет-кызлары беренче көне заманча альтернатив татар музыкасы концерты белән йомгакланды. Анда Зәринә Вилданова, Рәдиф Кашапов, Алинә Давыдова, Juna һәм Oscar&c7c5 төркеме чыгыш ясап, үзгә музыка яратучыларны селкетте-биетте, альтернативаны яратмаучыларны йоклатты.
"Проектлар аллеясе" башланды
Яшьләр форумында проектлар күрсәтү чарасы бара. "Проектлар аллеясе" дип аталган күргәзмә иртәнге 9дан эшли башлады. Паралмент җитәкчесе Фәрит Мөхәммәтшиннең килүен көтәләр. Башта президент Рөстәм Миңнеханов үзе килә дип белдерелгән иде.
