Акмәчеттә кырымтатарларның документларын тикшерәләр
Акмәчеттә Русия иминлек көчләре вокзал янындагы скверда сөрген корбаннарын искә алыргы җыелган кырымтатарларның документларын тикшерә.
Күпләрнең, хәтта бу чараны күрергә килгән җирле журналистларның да документларын тикшергәннәр.
Скверга җыелганнар кырымтатар гимнын җырлады, догалар кылды, хәтер тамгасына чәчәкләр салды.
Казанда кырымтатарларны сөрү көнен искә алдылар
Казанда Черек күлдә репрессия корбаннарына куелган һәйкәл янында кырымтатарларның ватаннарыннан куылуның 73 еллыгын пикет белән искә алдылар. Чараны Татар иҗтимагый үзәге оештырды.
Пикетта резолюция кабул ителде. Анда Кырымда гаепсез килеш кулга алынган бөтен кырымтатарларны азат итү, 1944 елда кырымтатарларны сөрүне Русия тарафыннан оештырылган геноцид дип тану таләбе куелган.
Судакта да сөрген корбаннары рухына догалар укыдылар
Судак шәһәрендә сөрген корбаннарын искә алу чарасы үтте. "Миллиәтебез белән аяк терәп торсак, без җиңәрбез! Аллаһы ярдәме белән дәүләтебез дә корылыр. Буйсынмадык һәм буйсынмаячакбыз. Кырымтатар мәҗлесе - безнең терәгебез", дип белдерелде әлеге матәм чарасында. Судак шәһәрендә сөрген корбаннары истәлегенә куелган һәйкәл янында бу төбәктән һәр авылдан күпме кешенең сөрелүен күрсәткән мәрмәр такталар да бар.
Кырымның Джанкой шәһәрәрендә кырымтатарларны ватаннарыннан сөргән урында - тимер юл вокзалына куелган истәлек тактасы янында вәхшәтле көннәрне искә алдылар. Вафат һәм һәлак булганнарның рухларына догалар укылды, чәчәкләр салдылар. Бу хакта Фейсбукта Заир Смедляев белдерде.
ATR каналында Cөрген көне марафоны
Кефедә (Феодосия) Русия полициясе кырымтатар милли хәрәкәте активисты Сулейман Карыдовны тоткарларга маташты. Бу хәл Кадыров хәтер тамгасы янына чәчәк салырга килгәч булды. Полиция аны инде җибәргән дип хәбәр ителә.
Акмәчеттә кырымтатарлар тоткарланган
Аннексияләнгән Кырым башкаласы Акмәчетнең үзәк мәйданында кырымтатарларны тоткарлаганнар. Бу хакта Кырымтатар корылтае сайлау комиссиясе башлыгы Заир Смедляев Facebookта хәбәр итә.
"Хәзер үзәк мәйданда безнең ватандашларыбызны тоткарлауларын хәбәр иттеләр. Алар арасында Сервер ага Караметов, Нариман Джемилев һәм Сервер Измайлов та та бар. Аларны эчке эшләр бүлегенә алып китеп баралар", дип язды ул.
"Сервер ага - паркинсон авыру кеше, ул мәйданга милли әләм белән чыккан, аны шуның өчен тоткарлаганнар. Коточкыч!" дип яза Facebookта Айшә Умерова.
Кичә прокуратура Кырымтатар Мәҗлесе әгъзаларының 18 майдагы матәм чаралары вакытында халык арасында булуы бу чараларны оештыру дип санала алуы һәм шуңа күрә аларны җаваплылыкка тарту мөмкинлеге турында белдерелгән иде.
Украинада минутлык тынлык һәм догалар
Кырымтатарларны ватаннарыннан сөрү көнен Украинада минутлык тынлык белән искә алдылар. Җирле вакыт белән 12 сәгатьтә кырымтатарларга карата булган геноцидны искә төшереп Киев патриархаты чиркәүләрендә чаңнар сукты һәм бу фаҗига вакытында вафат булганнарның рухларына догалар укылды.
Кырымтатар Мәҗлесе рәисе Рефат Чубаров Украина парламенты – Югары Радада чыгыш ясап кырымтатарларга теләктәшлек өчен украианнарга рәхмәт белдерде.
17 май кичен Киев үзәгендә Бәйсезлек мәйданында "Йөрәгеңдә ялкын кабыз" дип аталган чара үтте. Мәйданда шәмнәрдән кырымтатар һәм Украина тугралары, 73 саны белән Кырым ярымутравы ясалган һәм "No Genocide!" дип язылган иде.
