Корылтайның резолюция проекты бертавыштан кабул ителде. Без сезгә аның иң кызыклы һәм мөһим булган берничә маддәсен тәкъдим итәбез.
- Башкорт матбугатына даими ярдәм итү канунын кабул итү инициативасы белән чыгарга.
- Башкортостанның матди булмага мәдәни мирас турында канун кабул итү инициативасы белән чыгарга.
- 2020-2030 елларда республикада милли мәгарифне үстерү концепциясен кабул итәргә.
- Мәктәпкәчә һәм гомум белем бирү оешмалары өчен башкорт телен белгән педагог һәм фән укытучыларын максатчан укытуыны оештыру.
- Башкортостанда фундаменталь тарих фәнен үстерү республика програмын эшләргә һәм кабул итәргә.
- Яшь галимнәргә Русиянең югары уку йортларында һәм гыйльми оешмаларның аспирантураларында уку мөмкинлеге биргән дәүләт програмын кабул итәргә.
- Башкортлар күпләп яшәгән төбәкләрдә башкорт тарихи-мәдәни белем бирү үзәкләр челтәрен булдыру.
- Башкортстанга башкортларның үз ирке белән күчеп кайтуына ярдәм итү буенча республика програмы проектын эшләргә.
- 2020-2030 елларга “Русия башкортлары” дәүләт програмын эшләргә һәм кабул итәргә.
- Башкорт милли уен кораллары йортын булдырырга.
- Белем бирү үзәкләрен оештыру максатында башкорт лицей һәм гимназияләренә башкорт балалар бакчаларын беркетергә.
- Русия хакимиятенә төбәк телеканалларын дигитал эфир мультиплексларның бересенә кертү мөмкинлеген карауны сорап мөрәҗәгать итү.
Шуның белән пленар утырыш тәмамланды. Резолюция тексты кабул ителде, Корылтайның башкарма комитетына әгъзалар сайланды. Алга таба делегатларны концерт көтә. Иртәгә исә мәдәни чаралар каралган.
Азатлык җанлы блогта кызыклы фикерләрне, мөһим сөйләшүләрне тәкъдим итүне дәвам итә. Безнең белән калыгыз!
Корылтайдан көч кулланып чыгарылган делегатка штраф салынды
Фаил Алчыновны штрафсыз азат иттеләр, ләкин Илмир Мөхәмәтҗановка штраф салынды. Моның хакта Азатлыкка Алчынов үзе сөйләде.
"Мине полиция азат итте, ләкин Илмирны Киров районы мәхкәмәсенә алып киттеләр. Мәхкәмә аңа 20.1 маддәсе (хулиганлык) нигезендә 500 сум штраф салу карарын чыгарды", диде Алчынов.
Башкорт корылтаеның яңа рәисе кем булачак?
Кичен концерт вакытында Дөнья башкортлары корылтаеның хәзерге җитәкчесе Данир Гайнуллин концертны туктатып, вазифасыннан китүен хәбәр итте. Аның вазифаларын урынбасары Эльвира Аиткулова башкарачак диелде.
Башинформ язуынча, Корылтай уставына яңа кергән үзгәрешләргә күрә, хәзер аның "президиум"ы булачак. Президиумга алдагы 5 елга алты кеше сайланды. Әлеге президиум корылтайны Башкортстан Дәүләт корылтае рәисе урынбасары Эльвира Аиткулова җитәкләячәк дигән карар чыгарды.
Хәерле иртә, хөрмәтле укучыларыбыз! Башкорт корылтаеның икенче көнен башлыйбыз.
Бүген корылтай кунакларын Ишембай районына, Торатау геопаркына алып баралар. Күбрәк мәдәни чаралар каралса да, сәгать икедә Корылтайның җәмәгать оешмалары халыкара берлекнең башкарма комитеты утырышы узачак. Кичке дүрттә "Торатау җыены" фольклор бәйрәме узачак.
Без исә чараларны яктырту һәм бөтен дөньядан җыелган башкорт халкы вәкилләренең актуаль мәсьәләләргә фикерләре белән таныштыруны дәвам итәбез. Бүген дә безне укып барыгыз!
Тумышы белән Оренбурдан булган Вячеслав Чернев Варшава университетының шәркыять бүлегендә укый. Хәзерге вакытта Эразмус програмы белән ул Алманиядә дә белем ала. Вячеслав башкорт телен үзе өйрәнгән. "Мин Оренбурда туып өстем, бу тарихи башкорт җирләре. Башкорт телен өйрәнү минем өчен авыр булмады, төрки телләре белән балачактан кызыксынам", дип аңлатты ул тел өйрәнүен.
Башкорт теле матур яңгырашлы һәм мантыйклы тел, ди Чернев. Аны урыс теленә караганда өйрәнү җиңелрәк, монда бары тик дөрес юнәлештә алып барып укыту гына кирәк. Методиканы үзгәртү мөһим, хәзерге укытуда 1980 еллардан бирле үзгәрешләр юк, ди ул.
"Бер тел дә башка телдән ким түгел. Нинди тел генә булмасын, аларны өйрәнү кирәк. Миңа калса, үз туган төбәктәге телдән баш тартып булмый. Кайбер башкортлар урысчага күчә, алар барыбер урыс булып китми, урыслар аңында алар башкорт булып кала. Кала шартларында тел мохитен булдыру мөһим, мәктәптә укыту гына җитми. Башкортлыктан, татарлыктан курку кирәкми, аны көнкүрешкә кертү әһәмиятле", дип сөйләде ул Азатлыкка фикерләрен.
Вячеслав кайбер делегатларның корылтайга кертмәү мәсьәләсен дә ишеткән. Шул лаеклы кешеләр чакырылса, яхшы булыр иде. Ләкин бу кешеләр юк икән, корылтай да узмый дигәнне аңлатмый, дип саный ул.
Мәдәни чаралар дигәннән, кичә кич корылтай кунаклары ике концертта катнашты. Башта кунакларга корылтай үткән бинада Башкортстан сәнгать осталары концертын күрсәттеләр. Кичкә таба исә делегатларны "Ватан" этнопаркына чакырдылар, әлеге концерттан берничә фотосурәт тәкъдим итәбез.
"Башкорт" оешмасы тирәсендә хәлләр дәвам итә. Иртүктән хәрәкәтнең берничә активисты өйләрен полиция хезмәткәрләре саклап торган. "Күрәсең, бу беркем дә Торатауга бармас өчен ясала", дип яза "Башкорт" оешмасы төркеме.
Өч активистны, алар арасында "Башкорт" хәрәкәте җитәкчесе Фаил Алчыновны да Федераль иминлек хезмәтенә сорау алуга алып киттеләр, дип хәбәр ителә.