Сугыш көндәлеге. Беренче 85 көн

Мариупольдәге “Азовсталь” заводы җирлеген саклаучы Украина кораллы көчләре хәрби-диңгез флоты бригадасы командиры Серхий Волынский (Волына) планетаның иң бай кешесе, югары технологияләр инициаторы Илон Маскка мөрәҗәгать итте. Командир Русия агрессиясенә каршы көрәштә Украинаны яклавы белән билгеле булган Масктан Азовсталь заводы территориясендә калган солдатларны һәм яралыларны эвакуацияләүдә ярдәм сорый.

Украина ягы “Азовсталь”не саклаучыларны, беренче чиратта, яралыларны Русия әсирләренә алыштырырга тәкъдим итә. Украин сугышчыларын өченче ил территориясенә күчерү тәкъдим ителә, алар анда сугыш беткәнче калачак, диелә. Әлегә бу сөйләшүләр нәтиҗә бирмәде.

Финляндия массакүләм мәгълүмат чаралары хәбәр итүенчә, Һельсинки һәм Стокһольм инде киләсе атнада ук НАТОга керүгә гариза тапшыра ала. Җәмәгать фикерен белешү сораштыруларына күрә, Украинада сугыш башлангач, Швециядә бу карарны яклаучылар саны 57%ка, Финляндиядә - 76% ка арткан.

Украинадагы сугышта Башкортстаннан тагын бер кеше һәлак булган. Белорет районы Тирлән авылыннан 39 яшьлек Альберт Кәримов Баш күзләү идарәсе махсус хезмәте подполковнигы булган. Аның белән хушлашу бүген булачак, дип яза mkset. Хушлашудан соң матәм митингы узачак.

Азатлык Украинадагы сугышта Татарстан һәм Башкортстаннан һәлак булган кешеләрнең исемлеген туплап бара.

Белгород өлкәсе Солохи авылына Украина ягыннан ату вакытында бер кеше үлде, алты кеше яраланды. Бу турыда Белгород өлкәсе губернаторы Вячеслав Гладков хәбәр итте. Украинада сугыш башланганнан бирле бу Русиянең тыныч халкы арасыннан беренче корбан булды.

Al Jazeera журналисты Ширин Абу Акле Палестина качаклар аланында Израиль хәрбиләре һөҗүмен яктыртканда башына пуля тиеп һәлак булды.

Украина Европага газ җибәрү өчен бер генә юл калдырды, дип белдерде "Газпром" вәкиле Сергей Куприянов. Шуның аркасында Европага газ күчерү 34%ка кимегән

Финляндиядә мәхкәмә приставлары “Московский Комсомолец” газетасының баш мөхәррире Павел Гусевның дачасы һәм җиренә арест салганнар . Бу турыда YLE һәм Helsingin Sanomat хәбәр итә. Европа берлеге мәгълүматларынча, “Московский Комсомолец” Кремль риторикасын һәм гамәлләрен хуплый, ә Гусев Русия президенты Владимир Путинның ышанычлы вәкиле булып санала.

Март һәм апрель айларында телевидениене иң ышанычлы мәгълүмат чыганагы дип саный торган русияләр өлеше кимегән. Социаль челтәрләр һәм Телеграмга ышаныч, киресенчә, арткан. Бу хакта GroupM реклама төркеме тикшерүендә әйтелә дип яза Коммерсант.

Русиядә сәяси оппозиция вәкиле Илья Яшин үзенә карата Русия административ хокук бозу кодексының 20.3.3 маддәсе ("Русия кораллы көчләрен дискредитацияләү") нигезендә дүрт беркетмә төзүләре турында белдерде. Бу хакта ул үзенең фейсбугында хәбәр итә.

"Минем позициям гади. Беркемнән качарга җыенмыйм, үз сүземнән кире кайтмыйм. Мин сугышка каршы, чөнки Русия патриоты. Ә армияне, минем карашымча, бу җинаятьчел сугышны башлап җибәргән кешеләр дискредитацияли", дип яза Яшин.

Әлеге маддә буенча максималь җәза - 50 мең сумга кадәр штраф. Әмма ел дәвамында кылынган кабат хокук бозу очрагында җинаять эше кузгатылырга мөмкин, инде аның нигезендә ирегеннән мәхрүм ителү яный.

Украина хәрбиләре Харьков өлкәсендә тагын бер торак пунктын азат иткән. Бу — Украина хәрбиләренең берничә көн элек башлаган һөҗүме нәтиҗәсе. Бу көннәр эчендә инде 10 торак пункты азат ителгән. Украина баш хәрби штабы белдерүенчә, Мариупольнең “Азовсталь” заводындагы сугышны исәпкә алмаганда, башка юнәлешләрдә интенсив атышлар булмаган.

❗️ Чехия парламенты Русиянең Украинага каршы агрессиясен геноцид дип таныды

Элеграк нәкъ шундый карарны Литва парламенты кабул иткән иде.

Апрель-май башында Русия төбәкләрендә һәм аннексияләнгән Кырымда узган "Za Россию" концерт програмы Русия бюджетына 100 миллион сумга төшкән. Бу - Русиядә музыкаль чыгышларга түләү өчен иң кыйммәтле дәүләт килешүе, дип яза ВВСның урыс хезмәте.

• Русия хакимиятен хуплаган концертлардан тыш, әйтик Татарстанда Донбасска һәм Донбасс качакларына акча һәм һуманитар ярдәм җыю өчен хәйрия концертлары да уздырыла башлады.
• Татарстанның Актаныш районы Сәфәр авылы мәдәният йортында шундый хәйрия концерты оештырылды. Донбасс кешеләренә ярдәм итү өчен "Мәрхәмәтле йөрәк" дигән бу чараны оештыруны авылның мәдәният йорты җитәкчесе Илдус Һадиев тәкъдим иткән.
• Халыктан җыелган акчалар һәм әйберләр Чаллыдагы "Жемчужина" шифаханәсендә урнаштырылган "качакларга биреләчәк", дип сөйләде ул Азатлыкка.
• Элегрәк Татарстанның Ваһапов исемендәге татар мәдәнияте фонды да Казанның филармония залында "Кайсыгызның кулы җылы" исемле махсус концерт уздырган иде. Ул Украинадагы сугышта һәлак булган татарстаннар хөрмәтенә багышлана, концерттан кергән табыш Донбасска ярдәм итүгә җибәреләчәк, диелде.