Зеленский: Макрон Путинның "йөзен саклау" өчен юл бирүләргә ризалашырга тәкъдим итте
Франция президенты Эммануэль Макрон, Русия президенты Владимир Путинның "йөзен сакларга" ярдәм итү өчен, Украинага "суверенитетка кагылышлы юл бирүләргә ризалашырга" тәкъдим иткән.
Бу хакта Италиянең Rai 1 телеканалына әңгәмәсендә Украина президенты Владимир Зеленский белдергән.
Зеленский Украина "кемнеңдер нәрсәсендер сакларга һәм шуның аркасында җирләрен югалтырга" әзер түгел дип искәрткән.
Тулырак монда укый аласыз.
Уфада сугышка каршы пикет өчен Русия кораллы көчләрен дискредитацияләүдә гаеплиләр
Уфаның 9нчы полиция бүлеге хезмәткәрләре кичә сугышка каршы ялгыз пикетка чыккан 49 яшьлек Илдар Солтангировны Русия кораллы көчләрен дискредитацияләүдә гаепләп протокол төзегән. Бу турыда аның адвокаты Айдар Хызыров “Коммерсантъ”ка белдергән. Үз гамәлен аңлатып Солтангиров “Русия белән Украина арасындагы хәзерге хәлләргә бик нык тискәре караш белдерү теләге” турында язган.
Кичә полиция Солтангировны тоткарламаган, аның өенә бүген килгәннәр. Мәхкәмә көне әлегә билгеләнмәгән.
Украина кеше хокуклары вәкиле: “Мариупольдә 170 меңләп кеше ачлыктан интегә”
“Шәһәрдә коточкоч азык-төлек кытлыгы. Шул ук вакытта оккупантлар бер тәүлек эчендә 3,5 мең азык-төлек тупланмасы китерүләрен һәм 9 мең кешене кайнар ризык белән тәэмин итүләрен белдерә. Бу — шәһәрдәге халыкның 6,5 проценты гына. Ике ай дәвам иткән блокада вакытында рашистлар Мариупольгә Украинадан яки халыкара оешмалардан бер генә һуманитар конвойны да кертмәде, — дип язды Украина Югары радасының кеше хокуклары вәкиле Людмила Денисова.
Одессадагы кырымтатар спортчысы сугыш барганда волонтерлык белән шөгыльләнә
Одессада кырымтатар үзәген оештыручыларның берсе, көрәшче, Европа чемпионы, Кырымнан килеп Одесса өлкә шурасы депутаты булып сайланган 29 яшьлек Февзи Мамутов хәзер волонтерлык белән шөгыльләнә.
Бу хәйрия эшенә ул башка кырымтатарны да җәлеп итә, бергәләп украин сугышчыларына, хастәхәнәләргә ярдәм итә, сугыш барган Николаев шәһәренә су, азык-төлек ташыйлар.
"Бүген генә ике зур казан пылау пешереп, Николаевка 150 кешелек украин хәрби бүлегенә җибәрдек" диде ул әңгәмә вакытында.
Февзи Азатлыкка Одессаның соңгы вакытта ни өчен ешрак бомбалануы, шәһәрдәге татар тормышы һәм Одессаның элек Хаҗибәй дип аталганы турында сөйләде.
Британия Алина Кабаеваны һәм Путинның элекке хатынын чикләүләр исемлегенә кертте
Британия Русиягә карата чикләүләр исемлеген тагын да киңәйтте. Исемлеккә Русия президенты Владимир Путинның "сөяркәсе" дип шикләнелгән Алина Кабаева, элекке хатыны, аерылганнан соң Очеретная фамилиясе белән теркәлгән Людмила һәм башкалар да кертелде.
13 майда чикләүләр исемлегенә барлыгы 12 кеше өстәлде. Алар арасында Путинның туганнары һәм Британия хакимиятләре аның якыннары дип санаган кешеләр дә бар. Мәсәлән, Алина Кабаеваның әбисе Анна Зацепилина. Аны Путинның дусты Геннадий Тимченконың бизнес-партнеры дип атыйлар.
Исемлеккә Русия президентының туганнары — эшмәкәрләр Игорь Путин, Роман Путин һәм Михаил Путин, шулай ук Геленджик портының баш мөдире Владимир Колбин һәм башкалар да өстәлгән.
Тулырак монда укый аласыз.
Омски хәрби комиссариатына "Молотов коктейльләре" атканнар
13 майга каршы төндә билгесез затлар Омски үзәгендәге хәрби комиссариат бинасын яндырмакчы булган, дип хәбәр итә Om1.ru берничә чыганагына сылтама белән.
Бинаның ике тәрәзәсе ватылган, янгын эзләре бар. Шаһитләр әйтүенчә, бина янында керосин исе килә. Мөгаен бинага яна торган сыекча тутырылган шешәләр атканнардыр диелә. Полициядә бу хәлгә комментар бирүдән баш тартканнар.
Русия Украинага каршы сугыш башлаганнан соң Нижневартовски Балашиха, Ярославль, Череповец хәрби комиссариатларын да яндырдылар.
Тулырак монда укый аласыз.
АКШ Үзәк күзләү идарәсенең элекке башлыгы: Русиянең Украинага һөҗүме НАТОны ныгытты
Украинага һөҗүм итеп, Русия дөньяда үз позицияләрен ныгытмады, бары тик “НАТОны яңадан бөек итте” дип белдерде АКШ Үзәк күзләү идарәсенең элекке җитәкчесе Дэвид Петреус. НАТОга Финляндия белән Швеция кушылгач бу оешмада инде 32 әгъза ил булачак дип искәртә ул.
Украинага каршы сугыш Русия армиясенең системлы проблемнарын күрсәтте, Русия саклану министрлыгы модернизация һәм яңа техника турында хисаплар биреп килсә дә, сугыша әзерлек “оптималь дәрәҗәдән ерак” булып чыкты ди Петреус.
Башкортстан Корылтае депутатлары бер көнлек хезмәт хакын фетнәчел "Луһански халык республикасы"на күчерәчәк
Башкортстан Корылтае депутатлары бер көнлек хезмәт хакларын фетнәчел "Луһански халык республикасы"ның Красный Луч шәһәре халкына күчерәчәк. Бу хакта республика Дәүләт җыенының матбугат хезмәте хәбәр итә.
Дәүләт җыены рәисе Константин Толкачев әйтүенчә, хәзер бу шәһәр халкы бик авыр шартларда яши. Толкачев фикеренчә, шуңа күрә Красный Лучта яшәүчеләргә һәм фетнәчел "ЛНР"га кулдан килә торган һәртөрле ярдәм урынлы булачак.
Бер көнлек хезмәт хакына килгәндә, Башкортстан парламенты Константин Толкачевның 2020 елгы декларацияләнгән кереме 6 802 892,46 сум булган. Бер көнгә бу якынча 18 638 сум дигән сүз. Ә депутат Әхмәт Ишмөхәммәтовның 2020 ел нәтиҗәләренә күрә еллык кереме 279 765 148,32 сум булган, бер көнгә бу 766 479 сум була.
Тулырак монда укый аласыз.