Сугыш көндәлеге. Беренче 85 көн

Берләшкән милләтләр оешмасының үсеш програмы Украина халкының сугыш аркасында үсә барган ихтыяҗлары турында хисап бастырды. Хисапта әйтелгәнчә, сугыш аркасында илдәге сәнәгатьнең яртысы тулысынча ябылган, калган яртысы авырлыклар кичерә.

Озакка сузылган низаг ун украинның 9ын фәкыйрьлеккә этәрергә һәм илнең ике дистә елга якын үсешен куркыныч астына куярга мөмкин. Социаль-икътисади тармакта сугыш нәтиҗәләре гасырлар буена сизеләчәк, диелә.

"Москвич" — 1930 елдан 2010 елга кадәр эшләгән, Совет берлегенең һәм Русиянең машина җитештерү заводы иде. 1998 елда оешма "Рено Россия" контроленә күчте һәм француз маркалы машиналар җитештерә башлады.

Русия президенты Владимир Путин Украинага каршы сугыш башлагач, АКШ, Европа, Тайвань кебек илләр Русиягә карата технологик чикләүләр кертте. Европаның күп кенә ширкәтләре үзләре дә Русия базарына машина китермәячәген, Русиядә үзләре китергән детальләрдән машина җыюны туктатачагын игълан итте.

Шул ук вакытта Русиянең үзенеке саналган машиналарны җитештерү дә тулысынча диярлек туктап калачагы ачыкланды. Русия машиналары саналсалар да, аларның шактый алмаш детальләре читтән китерелүе турында күпләр беренче тапкыр ишетте.

Русия хәрбиләре камап алган Мариупольдагы “Азовсталь” заводы җирлегендә якынча 600 яраланган солдат бар, Бу хакта Украина милли гвардиясенең 12нче оператив бригадасы командиры Денис Шлега дәүләт телемарафоны барышында әйтте. Аның сүзләренчә, йөзләгән яралылардан 40ка якыны бик авыр хәлдә. Шлега дарулар һәм медицина кирәк-яраклары чыннан да җитми дип әйтеп, хәлне бик авыр булуын белдерде.

Венециядә сул тарафлы активистлар Русия, миллиардеры “Новатэк” газ ширкәте идарәсе рәисе Леонид Михельсон милке саналган сарайны басып алган. Бу турыда Facebookта Европада яшәүче Русия рәссамы һәм язучысы Екатерина Марголис язды. Михельсон, Русиянең иң бай ун кешесе арасына керә, апрель аеннан Русиянең Украинага каршы сугыш башлавы сәбәпле Британия һәм Канада аңа шәхси санкцияләр кертте, ләкин, Италиядә аның эшләре һәм милеге кагылгысыз иде.

2022 елның февраленнән апрель аена кадәр, ягъни Украинада сугыш башланганнан бирле Русия кибетләреннән тауар урлау саны узган елның шул чоры белән чагыштырганда 18% ка арткан, дип хәбәр итә NTechLab йөзне тану системасын уйлап табучыга сылтанып РБК. Кибетләрдән еш урлана торган тауарлар арасына кондитер ризыклары, колбаса, хәмер эчемлекләре, сыр, кофе һәм какао керә. Уртача бәя – мең ярым мең сум һәм бу узган ел белән чагыштырганда 25%ка күбрәк. Белгечләр урлауларның артуын халыкның сатып алу мөмкинлегенең кимүе һәм бәяләрнең күтәрелүе белән аңлата.

Финляндиядән соң Швеция дә рәсми рәвештә НАТОга кушылырга карар итте. Бу хакта Швециянең социал-демократ партиясе белдерде.

Русия үз хәрбиләренең җәсадларын кабул итүдән баш тарта. Алар Украина суыткычлары – рефрижератор вагоннарында урнаштырылган. Сүз берничә йөз үле гәүдә турында бара, дип белдерде Reuters.

Украина хәрби-гражданлык хезмәттәшлеге рәисе Владимир Лямзин сүзләренә караганда, Русия хәрбирләренең иң күп җәсадлары Киев өлкәсенә китерелгән. Шулай ук башка өлкәләрдә саклануын әйткән.

Украина халыкара хокук таләпләрен үтәп, “агрессорга җәсадларны бирергә әзер” ди ул.

Украина күптапкыр Русиягә хәрбиләрнең җәсадларын бирергә тәкъдим иткән. Русия йә баш тарткан, йә җавап бирмәгән, диелә.

Украинадагы сугышта Татарстаннан тагын бер кеше һәлак булган. Руслан Сәйфулинны кичә Азнакайның Күктәкә авылында җирләгәннәр. Бу хакта район газеты сайты хәбәр итә.

2004-2006 елларда армиядә хезмәт иткәннән соң, ул гаиләсе белән Казанда яши. Украинада сугыш башлангач, хәрби комиссариятка барып саклану министрлыгы белән килешү төзи.

Финляндия рәсми рәвештә НАТОга кушылырга карар итте. Бу хакта ил хөкүмәте хәбәр итә.

Мариуполь мэры киңәшчесе Петр Андрющенко «Азовсталь»гә тыелган фосфорлы бомбалар ташлануын хәбәр итә.