Yarımfinalda respublika rayon häm şähärlärennän, şulay uq Qazan, Çallı, Tübän Qama, Ägerce, Kukmara, Alabuğa häm Yäşel Üzännän 56 xatın-qız qatnaştı.
“Ğailä bäyräme” isemle yarımfinal ike öleştän uzdı. Berençese– icadi, biredä qatnaşuçılar jyuri äğzalarına häm kilgän qunaqlarğa ğailä aşı, ğailä säyäxäte turında “fotoxikäya” yäki ğailä konsertı täqdim itte. İkençe öleş – yarımfinalda qatnaşuçılarnıñ säxnädä matur itep yörep kürsätüe.
“Azatlıq”nıñ Qazan bülegenä şuşı bäygeneñ yarım finalında qatnaşqan Dinä Äxmätova bu bäygedä qatnaşuçılardan ayırılıp tora. Ostalıq, çibärlek, uñğanlıq buyınça köräşüçe xatın – qızlar arasında ul berdän – ber qäläm iäse, ädäbiät häm jurnalistika belän qızıqsına. Dinä xanım inde disä yıldan artıq bazarda kiem - salım sata, 15 yäşlek qızı bar. Üzeneñ bäygedä qatnaşıp qaraw telägen ul bolay dip añlattı:
“Neçkäbil” bäygese artınnan min inde öç yıl rättän küzätep baram. Çönki minem qızım “Elan stil'” model'lär mäktäbenä yöri häm alar älege bäygedä çığış yasağannarı buldı. Şuşı çığışlar waqıtında min anı ozatıp yörgän idem. Monda qatnaşuçılarnı min küzätep tordım häm üzem dä monda qatnaşıp qararğa buldım. Bäygeneñ berençe öleşendä bezne 20 keşedän torğan jyuri äğzaları äñgämä barışında saylap aldılar. Saylap alğannan soñ däreslär başlandı. Bez kön sayın kiç belän säğät altıda, uramda salqın buluğa qaramastan däreslärgä yördek. Ä menä şuşı “Ğailä bäyrämendä” bez üzebezne keşe bularaq açıp birergä tieş idek. Cırlağan keşe cırladı, biegäne biede, ä min inde yaza torğan keşe bulğaç minem çığışım ğadiräk bulıp çıqtı. Min Abdulla Alışnıñ “Neçkäbil” äsären säxnäläşterdem. Ber ay buyı bal qortı kostyumnarın bäylädem. Bu bäygedä qatnaşu minem öçen öskä taba ber basqıç bulıp tora. Çönki min satıp – alu ölkäsendä eşlim häm bu minem öçen tübänräk däräcä. Min bu bäygeneñ yarımfinalına qädär üttem häm töşep qalğanıma ber dä ükenmim. Xäzer inde min üzemä digän bieklekne aldım”.
Gölnaz Şäyxetdin
