Bügenge köndä Tatarstan jurnalistlar berlegendä 890 äğza isäplänä, alarnıñ 350се isä pensiä yäşendäge jurnalistlar. Berlektä Tatarstannan ğına tügel, şulay uq Mäskäw, Sankt-Peterburg, Ul'yan, Tömän töbäklärendä yäşäp icat itüçe qäläm iäläre dä bar. Qazan mädäniät üzägeneñ utırışlar zalında cıyılğan 100 yaqın delegat qatnaşlığında ütkän qorıltayğa Däwlät Sovetı räise Färit Möxämmätşin kilgän ide. Berlekneñ räise Rimma Ratnikova üzeneñ çığışında Jurnalistlar berlegeneñ eşçänlegenä näticä yasap, kiläçäkkä plannarı turında söyläde. Rimma Ratnikova süzlärenä qarağanda, soñğı waqıtta respublika jurnalistlarınıñ üz maqtawlı isemen - "Tatarstannıñ atqazanğan jurnalistı" isemen buldıru turında küp täqdimnär bulğan. Mondıy isemnär Ukrainada, Üzbäkstanda, Tacikstanda häm başqa töbäklärdä dä bar. Min bu xaqta Tatarstan Prezidentı belän söyläştem. Ul qarşı tügel, ämma Prezident mondıy isemne däwlät tügel, ä cämäğätçelek birsä döres bulır dip añlattı. Prezident Jurnalistlar berlegenä layıqlı keşelärne täqdim itärgä, ä ul üz çiratında isem birü turındağı Ukazğa qul quyaçağın äytkän. Şulay uq qorıltayda "Jurnalistlar berlege" ictimaği oyışmasınıñ yaña ustavı qabul itelde. Elekkegese 1990 yıldan birle eşläp kilde. İnde bu bügenge zaman taläplärenä cawap birmi ikän. Yaña ustav buyınça berlektä premiälär birü, jurnalistlarnıñ xoquqın yaqlaw, yäş jurnalistlar belän eşläw, milli jurnalistikanı üsterü komissiäläre häm veterannar sovetı buldırıla. Jurnalistlar berlegeneñ räise itep yänädän Rimma Ratnikova saylandı. Elekke yıllarda jurnalistlar berlege qorıltayı zur zallarda bik küp sanlı delegatlar häm däräcäle qunaqlar qatnaşlığında zurlap ütkärelä ide. Ä xäzer yartı meñnän artıq mäğlümat çarası terkälgän Tatarstanda berniçä meñ jurnalist eşli häm alarnıñ härqaysı üz basması, üz icadi qiblası qağidäläre qısalarında icat itä. Köçle jurnalistlar häm redaksiälär hönäri berlek kürsätmäsen kötep tormıy, möstäqillek kürsätep üzläre tudırğan proyektlar buyınça eşlär başqara. «Tatarstan» jurnalı başmöxärrire Rifat Fattaxov jurnalistlar berlege qorıltaenda qatnaşmadı, qayber mäğlümatlar buyınça ul anda çaqırılmağan da. Pänceşämbe könne Mäskäwdä Rusiä matbuğatınıñ altın fondına kertelü turında tanıqlıq alıp qaytqan Rifat Fattaxov comğa irtäsendä “Tatarstan Yaña ğasır” kanalında çığış yasadı. Ul 17 fevral'dä jurnalist Florit Ägzamovnı iskä alu kiçäsen ütkärelü turında söyläde. Küptän tügel wafat bulğan Florit äfände üzeneñ 70 yıllığın niçek ütkärü, iñ yaxşı ğalimnärgä, studentlarğa maxsus büläklär birü turında teläklären äytkän bulğan. Xäzer inde wasiätkä äylängän bu teläklärne “Tatarstan” jurnalı redkollegiäse isemennän tormışqa aşıru öçen uñaylı waqıt - Florit äfändeneñ tuğan köne kilep citte. 11 fevral'dä, şimbä könne kürenekle jurnalist, Qazan universitetınıñ , jurnalistika fakul'tetın häm tatar jurnalistika kafedrasın oyıştıruçı Florit Ägzamovnıñ tuuına 70 yäş tula. Yözlärçä talantlı jurnalistlar tärbiälägän pedagog, ğalim häm jurnalist Florit Ägzamovnıñ isemen mäñgeläşterü, cämğiättä jurnalist professiäseneñ däräcäsen üsterü, bu ölkägä yäşlärne yaqınaytu maqsatınnan “Tatarstan” jurnalı redkollegiäse 2006 yıl öçen jurnalistika ölkäsendä Ägzamov isemendäge “Tatarstan” jurnalı respublika premiäsen buldırğan ide. Azatlıq çığanaqları xäbär itüenä qarağanda, älege premiä “Respublika matbuğatın üsterü öçen” Tatarstan Prezidentı Mintimer Şäymievqa; “Matbuğat häm kitap näşriäte ölkäsendä küpyıllıq uñışlı xezmäte öçen” Tatarstan kitap näşriäteneñ elekke direktorı Ğaräf Şäräfetdinovqa häm ozaq yıllar Yuğarı Oslan rayon gazetası möxärrire bulıp eşlägän Rimma Troitskaya bireläçäk. Şulay uq “jurnalistika tarixı häm teoriäse ölkäsendäge qazanışları öçen” KDUnıñ jurnalistika häm sotsiologiä fakul'tetı dekanı Vasıyl Ğarifulin iä bulaçaq. Gölnaz Şäyxetdin
