Ğädättägeçä, Mädäni comğa gäcite soñğı sanında üzeneñ uquçıların atnalıq respublika xäbärläre belän tanıştıra, Tatarstan Däwlät Şurasındağı soñğı yañalıqlar turında Äğzam Fäyzraxmanovnıñ yazmasın bastıra. Tanılğan, bilgele icatçılar turında da yazmalar şaqtıy. Säxnä bieklegendä qalu rubrikasında Ramil Kuramşin Tatarstannıñ xalıq artistı Şamil Äxmätcanov turında yaza. Arçalardan iñgän ber moñ dip isemlängän mäqälädän tatar däwlät cır häm biü ansamblendä äydäp baruçı cırçı-solist bulıp 35 yıl eşläwçe artist xaqında belep bula. Yuqsınu säxifäsendä Ayaz Ğiläcev xaqında yazma urnaştırılğan. Yä, ber doğa, Ayaz abıy digän mäqäläneñ avtorı – Äzhär Şakirov. Bilgele artist Ayaz Ğiläcevneñ awır yazmışı turında söyli, anıñ xaqında üzeneñ istälekläre belän urtaqlaşa häm yazuçınıñ ber xatı belän dä tanıştıra. İsegezgä töşeräm, bu xaqta Mädäni comğa gäcitendä dönya kürgän Yä, ber doğa, Ayaz abıy digän mäqälädä uqıp bula.
Törle yubiley, istälekle datalar da iskä alınğan Mädäni comğanıñ bu atnada dönya kürgän sanında. Mäsälän, Ğabdulla Tuqaynıñ tuuına 120 yıl tulu uñayınnan Räbit Batullanıñ Qıldan neçkä, qılıçtan ütken digän qissasınnan özeklär urnaştırılğan. Älege qissada avtor Tuqaynıñ soñğı könnären niçek küzallawı turında yaza. Musa Cälilneñ yubileyı da iğtibarsız qalmağan. Bu yulı basmada Cälil häm bezneñ zaman digän mäqälä belän ğalim Flün Musın çığış yasağan. Şulay uq Mädäni comğa üzeneñ uquçılarına şiğri äsärlär dä täqdim itä. Bu yulı gäcittä Klara Bulatovanıñ äsärläre urın alğan.
Bu atnada dönya kürgän tağın ber basmada şaqtıy qızıqlı poema dönya kürgän. Süz Şähri Qazan gäciteneñ 15 mart sanı turında bara. Anda Xäläf Gardanovnıñ Bäläbäy poeması dönya kürgän. Poema Başqortstannıñ Bäläbäy şähärendä eşläp kilüçe tatar gimnaziäseneñ 10 yıllıq yubileyına bağışlanğan. Äsär berniçä bülektän tora. Anıñ berençe öleşendä avtor Bäläbäy şähärenä mädxiä uqıy. İkençesendä isä, älege yaqnıñ tabiğäte turında yaza, uquçılarnı bu töbäktä tuıp-üskän bilgele keşelär belän tanıştıra. Säyäsät tä onıtılmağan. Poemanıñ Sabantuy dip atalğan bülegendä süz Iq buylarında 10 yıl elek ütkän Iq buyı – Berlin diwarı digän aksiäse xaqında bara. Annarı avtor Bäläbäyneñ tatar gimnaziäse xaqında yaza. Gimnaziäneñ citäkçese – Nurmöxämmät Xösäyenov turında da yaza Xäläf Gardanov üzeneñ Bäläbäy poemasında. Bäläbäygä bağışlanğan şiğri äsären Xäläf Gardanov Bäläbäy yäşläre cırı belän tämamlıy. Başqortstannıñ Bäläbäy şähärendä eşläp kilüçe tatar gimnaziäseneñ 10 yıllıq yubileyına bağışlanğan äsär Şähri Qazan gäciteneñ 15 martta dönya kürgän sanında basılğan.
Gölnaz İlgizär
