Tatarstanda bilgele bulğan Taif şirkäte eşläw däwerendä üzeneñ berniçä keçe kompaniäsen tözede. Şularnıñ berse 1999 yılnıñ sentäberendä buldırılğan TVT teleradiokompaniäse. Ul Rusiädä kabel’ çeltäreneñ iñ öre operatorlarınıñ berse bulıp sanala. Teleradiokompaniä digäç tä, anı televizordan ezlärgä aşıqmağız. Älege şirkät tatarstanlılarğa maxsus suzılğan kabel’ aşa iärçen häm efir kanalların qaraw mömkinlegen birä. Xäzerge köndä TVT kompaniäsenä totaşqan keşelär 30dan artıq kanal qaraw mömkinlegenä iä. Buşlay tügel, älbättä. Läkin ällä ni zur bäyä dä tügel, ayına 150 sum. Mondıy mömkinlek respublikanıñ 3 iñ ere şähärlärendä – Qazan, Çallı, Älmättä yäşäwçelärdä bar. Kompaniä wäkilläreneñ mäğlümätlärenä qarağanda, Tatarstanda alarnıñ 450 meñnän artıq abonentları bar. Häm bu san üsä bara. Nik disäñ, respublikada berniçä genä televidenie kanalı kürsätä. Xätta Qazan bulıp Qazanda da ğadi antenna yärdämendä nibarı 7-8 kanalnı qarap bula. Başqa şähär awıllarda isä bu san tağı da keçeräk. Şuña da, keşelär bik teläp küp kenä östämä kanallarnı qarawğa yul açqan TVTğa möräcäğät itep, anıñ qullanuçıları bulalar. Häm näfis fil’mnar, sport, muzıka, xäbärlär, balalar, fänni-populyar tapşırulardan torğan kanallarnı räxätlänep, çikläwsez qarıy ala. Alar arasında kürşe Başqortstannıñ BST dip isemlängäne dä bar. Monda şunı da äytep kitärgä kiräk, Tatarstannıñ Yaña ğasır iärçen kanalı inde menä niçä yıl tırışıp ta, üzläreneñ tapşıruların Başqortstanda eşli torğan kabel’ çeltärlärenä kertä almıy integä.
Keşelärne kabel’ çeltärläre totaştırudan tış, TVT kompaniäseneñ FM yışlığı da bar äle. Kompaniä anı 2002 yılda Mäskäwdä uzğan bäygedä ciñü yawlap aldı. Şul uq yılnıñ avgust ayında älege yışlıqta inde Avtoradio-Qazan digän kanal da eşli başladı.
Menä şundıy kompaniäne satırğa teli dä inde Taif şirkäte. Xäyer, TVTnıñ üzendä, satılu turında bezdä älegä bernindi dä mäğlümät yuq, dip belderdelär. Kommersant gäcite mäğlümätlärenä qarağanda, TVTnı 3 şirkät alırğa teli – Nafta-Mäskäw törkeme, Renova xoldingı, Sistema kompaniäse. Bu 3 şirkät Rusiädä tüläwle televidenie qırında eşläwçe iñ zur kompaniälär. Älege kompaniälärneñ qaysı ciñär, älegä bilgele tügel. Läkin TVTnı kem genä satıp alsa da, ildä inde bütän ere kabel’ televidenie kompaniäläre qalmayaq. TVTdan soñ investorlarnıñ iğtibarı töbäklärdäge bäläkäy şirkätlärgä küçäçäk, digän fikerdä tora belgeçlär.
Gölnaz İlgizär
