Qazan munitsipal’ berämlegeneñ Başqarma komitetı citäkçesen saylaw teması bu aralarda respublikada iğtibar üzägendä tordı. Başqa waqıtlarda ällä ni zur qızıqsınu uyatmağan saylawlar Qazannıñ başlığı itep İlsur Metşin saylanğannan soñ, küplärneñ iğtibarın cälep itte. Çönki Başqarma komitetınıñ citäkçese kem buluı mäğlümätle keşelärgä Qazannıñ citäkçelege şähärneñ üseşen nindi yünäleştä alıp barırğa cıyınuın añlata.
Saylawlar ike öleştän tordı. 14 aprel’ könne Qazan ratuşasında İlsur Metşin citäkçelegendä komitet başlığın saylaw buyınça komissiä utırışı uzdı. Anda älege wazifağa nämzätlär belän söyläşü buldı. Şunısın da äytergä kiräk, bäyge iğlan itelgännän soñ berençe bulıp üz nämzäten xalıq arasında bilgele bulmağan Marat Zahidullov täqdim itte. Bu yulı saylawlar al’ternativasız bulır kebek dip kenä torğanda, nämzätlärne kürsätü tämamlanası könne genä Qazannıñ Başqarma komitetı citäkçese bulırğa teläklären tağın 4 keşe belderde. Şähär küperläre berläşmäseneñ citäkçese Ayrat Älmiev, şähärneñ Sovet rayonı toraq idäräseneñ elekkege citäkçese Aleksandr Polivin häm härber diärlek saylawlarda qatnaşuçı Aleksandr Berdnikov belän İrek Mortazin. Alarnıñ härbersen üzläre yanına çaqırıp, komissiä äğzäläre nämzätlärneñ komitet başlığı bulıp saylansalar niçek häm närsä eşlärgä cıyınuın beleşte. Annan soñ, ällä ni ozaq uylamıy komissiä täqdim itelüçelär arasınnan bäygeneñ ikençe öleşendä qatnaşırğa layıqlılarnı saylap aldı. Andıylar ikäw bulıp çıqtı – Marat Zahidullov belän Ayrat Älmiev.
Menä şuşı ike nämzät arasında ciñüne yawlawçı 20 aprel’dä bilgelände. Qazannıñ şähär Şurasınıñ pänceşämbedä uzğan sessiäsendä deputatlar Başqarma komitetnıñ citäkçese saylandı. Kötelgänçä, yaña başlıq Marat Zahidullov buldı. Kem soñ ul – Qazan munitsipal’ berämlege Başqarma komitetınıñ yaña citäkçese... Marat Zahidullovqa äle nibarı 32 genä yäş buluğa da qaramastan, ul inde şaqtıy täcribäle häm bilgele keşe. Marat äfände Qazanda tuğan, monda mäktäpne betergän. Annarı soñ belem aluın däwam itep, tağın berniçä yuğarı uqu yortın tämamlağan. Alar arasında Mäskäwneñ iqtisat häm statistika universitetı, iqtisat häm xoquq institutı ğına tügel, xätta Quşma ştatlardağı Kaliforniä universitetı da bar. Bik küp cirlärdä uquına da qaramastan, anıñ eşlägän cirläre dä baytaq. Marat Zahidullovnıñ 10 yıldan artıq eş täcribäse bar. Ul Motovilixinskie zavodı berläşmäsendä eşlägän, Mäskäwdäge Rus’ isemle finans yortınıñ general’ direktorı, Ekonatsbanknıñ Direktorlar Şurası räise bulğan. Däwlät eşendä dä bulğan. Rusiäneñ Milek ministrlığında ul bülek başlığı wazifasın ütägän. Marat Zahidullovnıñ soñğı eş urını – Transkreditbank. Anda ul prezident kiñäşçese bulğan.
Menä şundıy keşe citäkläyäçäk xäzer Qazannıñ başqarma komitetın. Marat Zahidullov üzeneñ şundıy eşlärne taşlap Qazanğa qaytuına, bu bit minem tuğan cirem, minem monda äni haman da yäşi, tuğan şähärem öçen nindider yaxşılıq eşlisem kilä, min Qazannıñ problemaları belän tanış, dip belderde. Ä menä şähär, xätta respublika xakimiätläreneñ bu wazifanı nigä çittän kilgän keşegä tapşıruları xaqında menä nindi fikerlär bar. Mäsälän, Zvezda Povoljya gäciteneñ baş möxärrire Räşit Äxmätov Marat Zahidullovnı Mäskäw finans strukturalarınnan aqçalar cälep itär öçen kiräk, dip uylıy. Anıñ fikerençä, Mintimer Şäymiev üzeneñ urınına İlsur Metşinnı qaldırırğa niätli. Monıñ öçen Metşinğa federal` xakimiätneñ ışanıçın buldırırğa kiräk. Menä şuşı yünäleştä Marat Zahidullov häm anıñ finans duslarınnan yärdäm dä kötälär ikän, Qazan xakimiätläre.
Yaña citäkçe aña bağlağan şuşı ömetlärne aqlarmı, xäzergä bilgesez. Xäyer, anıñ alda waqıtı äle şaqtıy. Marat Zahidullov belän kileşü 5 yılğa tözelgän.
Gölnaz İlgizär
